اسلام آباد ۔ 7 مارچ (اے پی پی) وزارت خزانہ میڈیا دے کجھ حصیاں اچ چھپنڑ آلیاں اے خبراں مسترد کرڈتن جو جاری اقتصادی صورتحال پاروں ایں سال بے روزگاری دی شرح 8 فیصد رہنڑ،ڈاہ لکھ لوکاں دے بے روزگارتھیونڑ، مہانگ اچ 24 فیصدودھارے اتے بئے ہک کروڑلوکاں دے غربت دی لکیردے تلے ونجنڑ دے مبالغہ آمیز دعوے کیتے گین۔ترجمان وزارت خزانہ آکھیے جو اینجھے خبراں اچ کوئی صداقت کائنی،لیبر فورس داتازہ ترین سروے حالی چھپیا وی کائینی،روزگاربارے صورتحال دی حقیقی عکاسی اتے اعدادوشمار پاکستان بیور وبرائے شماریات دے لیبر سروے دی اشاعت دے بعد سامنڑے آسن، حقیقت اے ہے جو ملک دی اقتصادی صورتحال ڈینھ و ڈینھ بدلدی پئی اے،ملکی معیشت کیتے اقدامات دے نتیجے آونڑ لگ گین،معاشی اشاریاں دی چنگائی،حسابات جاریہ دے خسارے اچ 72 فیصد کمی،اورسیز پاکستانیز ولوں ترسیلات زراچ 4.1 فیصدودھارا،براہ راست غیرملکی سرمایہ کاری اچ 65.7 فیصد ودھارا،برآمدات اچ اضافہ دی شرح 3.6 فیصد ریکارڈتھیونڑ چنگائی دا ثبوت اے،ایویں ہی بے روزگاری دی شرح اتے ایندے اچ متوقع اضافہ دادعویٰ وی حقائق دے منافی اتے بے بنیاداے۔وزارت خزانہ آکھیے جو حکومت مہانگ تے قابو پاونڑ کیتے کم کریندی پئی اے،بنیادی اشیاءضروریہ دی ودھ فراہمی، ذخیرہ اندوزی، سمگلنگ اتے ناجائز منافع خوری مکاونڑ کیتے جامع اقدامات سودھا وفاقی اتے صوبائی سطح تے قیمتاں تے اکھ رکھنڑ کیتے نگرانی دا موثرنظام کیتا گئے جیندے چنگے نتیجے نکلدے پین۔
