کورنا وائرس دنیا دے 186 ملکاں اچ کھنڈ گے ، 2 لکھ 77 ہزار توں ودھ کیسز رپورٹ تھئن دنیا اچ 11 ہزار 431 لوکاں دی موت تھئی اے ، پاکستان اچ ایں ویلھے کرونا دے مشتبہ کیسز دی تعداد 4 ہزار 46 اے ، گزریل 24 گھنٹے اچ 664 مشتبہ کیسز رپورٹ تھئن ، ملک اچ کرونا وائرس دے پازیٹو کیسز دی تعداد 534 اے،ملک اچ کرونا پاروں ترائے لوک جاں بحق تھئن ،کرونا وائرس نال صحتیابی دا تناسب 97، 98 فیصد اے،، وزیراعظم دے معاون خصوصی صحت ڈاکٹر ظفر مرزا دی پریس کانفرنس
ڈو ہفتے کیتے بین الاقوامی پروازاں عارضی طور تے معطل رہسن ،جڈاں پروازاں بحال تھیسن تاں کرونا ٹیسٹ دی شرط کائناں ہوسی ، مسافر بغیر سرٹیفیکیٹ آ سگسن ایئر پورٹس تے انہاں دی سکریننگ کیتی ویسی ،ڈاکٹر معید یوسف
کرونا وائرس توں تحفظ دے حوالے نال حکومت وڈی رقم رکھی اے ،چیئرمین این ڈی ایم اے
اسلام آباد ۔ 21 مارچ (اے پی پی) وزیراعظم دے معاون خصوصی صحت ڈاکٹر ظفر مرزا آکھیے جو کورنا وائرس دنیا دے 186 ملکاں اچ کھنڈ گے ، 2 لکھ 77 ہزار توں ودھ کیسز رپورٹ تھئن دنیا اچ 11 ہزار 431 لوکاں دی موت تھئی اے ، 2 لکھ 77 ہزار کیسز اچ 92 ہزار لوک مکمل طور تے صحت یاب تھی تے ڈسچارج تھی چکن ۔پاکستان اچ ایں ویلھے کرونا دے مشتبہ کیسز دی تعداد 4 ہزار 46 اے ، گزریل 24 گھنٹے اچ 664 مشتبہ کیسز رپورٹ تھئن ، ملک اچ کرونا وائرس دے پازیٹو کیسز دی تعداد 534 اے،ملک اچ کرونا پاروں ترائے لوک جاں بحق تھئن ،کرونا وائرس نال صحتیابی دا تناسب 97، 98 فیصد اے۔ ہفتے کوں اتھاں وزیراعظم دے مشیر قومی سلامتی ڈاکٹر معید یوسف اتے این ڈی ایم اے دے چیئرمین لیفٹیننٹ جنرل محمد افضال دے رلے میڈیا بریفنگ نال خطاب کریندے ہوئیں انہاں آکھیے جو پاکستان اچ ایں ویلھے کرونا دے مشتبہ کیسز دی تعداد 4 ہزار 46 اے جڈاں جو گزریل 24 گھنٹے اچ 664 مشتبہ کیسز رپورٹ تھئن ، ملک اچ کرونا وائرس دے پازیٹو کیسز دی تعداد 534 اے جیں اچوں پنجاب اچ 104، سندھ اچ 256، خیبرپختونخوا اچ 27، بلوچستان اچ103، گلگت بلتستان اچ 30، آزاد جموں و کشمیر اچ ہک تے اسلام آباد اچ 10 کنفرم کیسز ہن۔ انہاں آکھیے جو کرونا وائرس دے پازیٹو کیسز اچ صحت یابی دی شرح اچ بہتری تھیندی پئی اے ہنڑ تئیں 5 مریض صحت یاب تھی تے ڈسچارج تھی گن جڈاں جو آندے ڈینھاں اچ مزید صحت یاب تھیسن ۔ انہاں آکھیے جو تفتان بارڈر تے سکریننگ دی سہولتاں کوں تنقید دی نگاہ نال ڈیکھنڑ دی بجائے مثبت انداز اچ ڈیکھنڑ دی ضروت اے کیوں جو اتھاں موجود نظام توں ہی پازیٹو کیسز دا پتہ چلا تے انہاں دا علاج شروع کیتا گے ۔ایں موقع وزیراعظم دے قومی سلامتی دے مشیر ڈاکٹر معید یوسف آکھیے جو ملک اچ بین الاقوامی پروازاں دے حوالے نال فیصلہ کیتا گے جو ڈو ہفتے کیتے بین الاقوامی پروازاں عارضی طور تے عمل رہسن ۔گزریل ہفتے پاکستان عالمی مسافراں کیتے کرونا ٹیسٹ سرٹیفکیٹ دی شرط رکھی ہئی لیکن حالات پاروں گزریل ڈینھ کمیٹی اجلاس اچ فیصلہ کیتے جو ہفتے 21مارچ شام اٹھ توں چار اپریل شام 8وکءتئیں ڈو ہفتے کیتے سارے عالمی پروازاں تے پابندی ہوسی ۔انہاں آکھیے جو اے اوکھا فیصلہ اے لیکن وزیراعظم سارے شراکت داراں نال مشاورت دے بعد پروازاں دی عارضی معطلی دا فیصلہ کیتے۔ انہاں آکھیے جو پاکستان آونڑ آلے سفات کاراں تے کارگو جہازاں تے پابندی کائناں ہوسی ۔ پریس کانفرنس نال خطاب کریندے ہوئیں نیشنل ڈیزاسٹر مینجمنٹ اتھارٹی (این ڈی ایم اے) دے چیئرمین لیفٹیننٹ جنرل محمد افضال آکھیے جو فلائٹس دی عارضی معطلی دا مقصد اے جو لوکاں دی سکریننگ دی سہولتاں کوں بہتر بنڑایا ونج سگے ۔انہاں آکھیے جو پاکستان اچ داخل تھیونڑ آلے تفتان ، چمن اتے خیبر دے مراکز تے صوبیں تے ایف سی دے قرنطینہ مراکز قائم کیتے گن تے آندے 10 توں 15 ڈینھ اچ انہاں اچوں ہک ہزار کمریں دا مزید اضافہ کیتا ویسی ۔انہاں آکھیے جو این ڈی ایم اے دی معاونت نال قرنطینہ مراکز دے نظام کوں بہتر بنڑایا گے۔ ڈاکٹر ظفر مرزا پریس کانفرنس دے چھیکڑ اچ ڈسائے جو حکومت پاکستان عوام کوں کرونا وائرس بارے میڈیا بریفنگ ڈیسی ۔
