نینگراں تے مشتمل ٹائیگر فورس فوج تے انتظامیہ نال رل تے ریلیف اتے آگاہی دا کم کریسی،وزیراعظم کرونا ریلیف فنڈز یکم اپریل توں فعال تھی ویسی،وزیر اعظم ڈسائے جو سٹیٹ بینک آف پاکستان ایں وبا دے دوران اپنڑے ملازماں کوں فارغ نہ کرنڑ آلے اداریاں اتے کمپنیاں کوں سستے تے سوکھے قرضے ڈیسی، احساس پروگرام دے تحت مستحق لوکاں کوں صدقہ خیرات اتے امداد ڈیونڑ کیتے ایں پروگرام دا فیس بک پیج اداریاں وچال رابطے کیتے ہتھ ونڈیسی۔وزیراعظم عمران خان دا قوم نال خطاب
اسلام آباد ۔ 30 مارچ (اے پی پی)وزیراعظم عمران خان ملک اچ کورونا وائرس نال نبڑنڑ کیتے ٹائیگر فورس بنڑاونڑ اتے وزیر اعظم کرونا ریلیف فنڈز قائم کرنڑ دا اعلان کرڈتے ۔وزیراعظم عمران خان قوم نال خطاب اچ آکھیے جو پوری قوم کرونا وائرس دے خلاف جنگ لڑدی پئی اے ،جیکر ساڈے وی چین جیہے حالات ہوندے تاں پورا ملک لاک ڈاﺅن کرڈیوں ہا ۔ساڈا وڈا مسئلہ غربت اے۔جیکوں بیا اوکھا نئی کرنڑ چاہندے ۔انہاں آکھیے جو پوری قوم رل تے ایں وبا نال لڑ سگدی اے ۔جیکر لاک ڈاﺅن کرنڑاں وی پیا تاں ایندے کیتے پہلے منصوبہ بندی کرنڑیں ہوسی ۔اے نہ تھیوے جو نریندر مودی وانگوں بغیر سوچے سمجھے لاک ڈاﺅن کرنڑ تے قوم توں معافی منگڑیں پووے۔کیوں جو لوکاں کوں کھانڑاں نہ پجا تاں لاک ڈاﺅن کڈاہیں کامیاب نہ تھیسی۔انہاں آکھیے جو وسائل دی کمی دے بدلے اچ اساڈے کول ایمان دی طاقت اتے ودھ نینگر آبادی اے ۔تہوں نینگراں تے مشتمل ٹائیگر فورس بنڑاونڑ دا فیصلہ کیتے ۔جیڑھے فوج تے انتظامیہ نال رل تے کم کریسن ۔ اے فورس لاک ڈاﺅن آلے علاقیاں اچ ریلیف اتے آگاہی دا کم کریسی۔وزیراعظم کرونا ریلیف فنڈز دا وی اعلان کیتے جیرھا نیشنل بینک آف پاکستان مین برانچ کراچی اچ کھولیا گئے۔اے اکاوئنٹ نمبر 4162786786 یکم اپریل توں شروع تھی ویسی۔وزیر اعظم ڈسائے جو سٹیٹ بینک آف پاکستان ایں وبا دے دوران اپنڑے ملازماں کوں فارغ نہ کرنڑ آلے اداریاں اتے کمپنیاں کوں سستے تے سوکھے قرضے ڈیسی۔ جڈاں جو اے فیصلہ وی کیتا گئے جو احساس پروگرام دے تحت مستحق لوکاں کوں صدقہ خیرات اتے امداد ڈیونڑ کیتے ایں پروگرام دا فیس بک پیج اداریاں وچال رابطے کیتے ہتھ ونڈیسی۔
