اسلام آباد ۔ 14 جون (اے پی پی)سرائیکی عوامی تریمت تحریک دی صدر ادی کرن لشاری دا آکھنڑ اے جولوک اشاک تھیون جو کرونا کوئی مذاق نئیں، اے اندھا وائرس کہیں عقیدے، مسلک، زبان، امیر، غریب، زات یا قومیت دا لحاظ نی کریندا،احتیاط کیتے بغیر کوئی راہ کائنی۔اے پی پی نال خصوصی گالھ مہار کریندے انہاں آکھیے جو وچ چین تو شروع تھیونڑ آلی وبا کھنڈ تے پوری دنیاں کوں ولھیٹ اچ گھن گھدے،لکھاں لوک فوت تھین اتے ھک کروڑ تئیں ایں وائرس تو متاثر ھن، دعا اے جو اللہ پاک تیکھے اپنڑی رحمت دا مینھ وساوے جو کل جہان ایں وبا کنے سکھ دا ساہ گھنے۔انہاں آکھیے جو اے وائرس ہک امتحان وی اے تے کجھ آپ انسان وی ایں وائرس کوں بیا تکڑا کرنڑ دی وجہ ہین،افسوس اے جو ساڈی ادھی آبادی ایندی ہلاکت خیزی بارے اشاک نی تھئی، ایندے تے کئی واری مذاق وی اڈایا ویندا رہے،بیماری دے ثبوت منگیے گین،کہیں تاں ایکوں فرقے بازی یا کفار دی سازش آکھ تے سادہ لوکاں کوں گمراہ کیتے اتے منفی پروپگنڈے نال عوام کوں بیا کنفیوزڈکیتا گئے،وزیر اعلیٰ سندھ اھتیاط ورتنڑ کیتے ہتھ جوڑین تاں ایندا پورے جگ اچ واویلا کیتا گئے بھل اج اے موذی وبا وفاق توں وساخ دے دروازے کھڑکیندی کھڑی اے،ہر پاسے لوک ایندا شکار تھیندے پین ،میکوں سمجھ نئیں آندی جیڑھی عوام لاک ڈاون اچ بھک مردی پئی ہئی او رمضان شریف دے اخیری عشرے وچ دل کھول تے بغیر کہیں ڈر دے ریکارڈ تروڑ شاپنگ کیویں ودی کریندی ہئی،ھا، بحیثیت قوم اساڈی اجتماعی نااہلی پاروں ملخ وچ کرونا متاثرین دی تعدادڈیڈھ لکھ دے نیڑے پج گئی اے،ہنڑ مریض وی سامنڑے ڈسنڑ پئے گین تے یقین وی آگئے جو اے وبا واقعی ہے پئی۔ ادی ادی کرن لشاری عوام توں ارداس کیتی اے جو خدارا اجاں وی ویلھا اے جو اساں اپنڑے آپ توں ایں وبا دے خلاف جنگ شروع کروں جیندا علاج ہکو احتیاط اے،ولا ولا ہتھ دھونڑ، ماسک لاونڑمیل جول اچ وتھی رکھنڑ،بغیر وجہ گھرو نہ نکلنڑتے عمل بہوں ضروری اے ،رش اچ نہ ونجنڑ ہی چنگائی اے جیندے نال اساں اپنڑے آپ کوں، اپنڑے گھر آلیاں کوں ،ٹبر کوں اتے بئے لوکاں کوں ایندے توں بچا سگدے ہیں۔انہاں آکھیے جو وطن عزیز وچ صحت دی سہولیات پہلے ہی ناکافی ھن اتوں اے ھک اندھا وائرس اے جیڑھا کہیں عقیدے، مسلک، زبان، امیر، غریب، زات یا قومیت دا لحاظ نی کریندا،اساں عوام جے تئیں آپ اشاک نہ تھیسوں تاں ڈاکٹر کجھ کر سگدن تے نہ ہی حکومت۔ایں کیتے عوام کوں آپدی ذمے واری نبھاونڑی چاہیدی اے۔
