ملتان ۔ یکم جون (اے پی پی)اج 2 جون سقوط ملتان دے حوالے نال پورے سرائیکی وسیب اچ یوم سیاہ دے طور تے منایا ویندے تے والئی ملتان نواب مظفر خان شہید دی عظیم قربانی کوں خراج عقیدت پیش کیتا ویندا پئے ۔ ایں سلسلے اچ سرائیکستان صوبہ محاذ تے بیاں جماعتاں دے زیر اہتمام اج ڈینھ 11وجے ڈو جون سقوط ملتان و یوم شہادت نواب مظفر خان شہید دے حوالے نال سیمینار منعقد تھیسی ، قلعہ کہنہ قاسم باغ تے رنجیت سنگھ دا پتلا ساڑیا ویسی تے دربار بہاﺅ الدین زکریا ملتانی دے احاطے اچ مدفن نواب مظفر خان شہید دے مزار تے فاتحہ خوانی تے چادر پوشی کیتی ویسی ۔ نواب مظفر خان شہید فاﺅنڈیشن دے چیئرمین ڈاکٹر احسان احمد خان سدوزئی دی قیادت اچ وی چادر چڑھائی ویسی ۔ واضح رہے جو 2 جون 1818ء کوں رنجیت سنگھ دی سکھافوج دا عظیم جرات دے نال مقابلہ کیتا ۔ نواب مظفر خان اتے ملتان دی سپاہ جان ڈتی مگر رنجیت سنگھ دے اگوں ہتھیار نہ سٹیے ۔ سرائیکی قوم پرست جماعتاں دے ڈینھ یوم سیاہ دے طور تے منیندن ۔ سرائیکی قوم پرست جماعتاں پی پی ، ن لیگ ، تحریک انصاف ، جماعت اسلامی ، جمعیت العلمائے اسلام ، جمعیت العلمائے پاکستان تے بیاں جماعتاں کوں وی دعوت ڈتی ویندی اے جو او نواب مظفر خان کوں خراج عقیدت بھیجنڑ کیتے اگوں آون ۔ والئی ملتان نواب مظفر خان شہید ، جنہاں سکھا فوج دے خلاف مزاحمت کریندے ہوئیں ملتان دی سپاہ دے نال نال اپنڑی اولاد وی قربان کیتی انہاں کوں خراج عقیدت پیش کیتا ویندے ۔
