میزبان ٹیم کوں گرین شرٹس دے خلاف سیریز اچ 1-0 دی برتری حاصل اے
ساﺅتھ ہیمپٹن ۔ 19 اگست (اے پی پی) انگلینڈ اتے پاکستان دیاں کرکٹ ٹیماں وچال ترائے ٹیسٹ میچاں تے مشتمل سیریز دا تریجھا تے چھیکڑی ٹیسٹ میچ 21اگست کوں روز باﺅل، ساﺅتھ ہیمپٹن وچ شروع تھیسی۔ انگلینڈ دی ٹیم کوں پاکستان دے خلاف ترائے میچاں دی سیزیز اچ 1-0 دی برتری اے۔ میزبان ٹیم گرین شرٹس کوں پہلے ٹیسٹ میچ اچ 3 وکٹاں توں ہرائے جڈاں جو ڈوہیں ٹیماں وچال کھیڈیا گیا ڈوجھا ٹیسٹ میچ ہر جت دے فیصلے دے بغیر ہی ختم تھی گیا ہئی ۔ انگلینڈ ٹیم دی قیادت جو روٹ کریسن ، پاکستان دی ٹیم اظہر علی دی قیادت اچ میدان اچ لہسے۔ پاکستان ٹیم کوں سیریز برابر کرنڑ کیتے چھیکڑی ٹیسٹ جتنڑ ضروری ہوسی جڈاں جو انگلش ٹیم کوں سیریز جتنڑ کیتے چھیکڑی ٹیسٹ گھٹ توں گھٹ ڈرا کھیڈنڑاں ہوسی ،ڈوہیں ٹیماں دے کپتاناں سیریز دے چھیکڑی میچ اچ کامیابی کیتے بیان ڈتن ، ایں اعتبار نال توقع کیتی ویندی پئی اے جو ٹیسٹ سیریز دا تریجھا تے چھیکڑی میچ سخت تے کانٹے دار ہوسی ۔ایندے توں پہلے میزبان ٹیم کالی اندھاری کوں ترائے ٹیسٹ میچاں دی سیریز اچوں 2-1 توں ہرائے ۔ واضح رہے جو ٹیسٹ سیریز پوری تھیونڑ دے بعد ڈوہیں ٹیماں شیڈول اچ شامل ترائے ٹی20 میچ کھیڈنڑ کیتے ہک واری ول اولڈ ٹریفورڈ مانچسٹر ویسن جتھاں ترائے ٹی ٹونٹی میچز دی سیریز دا پہلا میچ 28 اگست کوں ڈوجھا میچ 30 اگست کوں تے تریجھا میچ یکم ستمبر کوں کھیڈیا ویسی ۔
