اسلام آباد ۔ 24 اگست (اے پی پی) صدرمملکت ڈاکٹر عارف علوی عالمی برادری تے زور ڈتے جو او غیر قانونی طور تے مقبوضہ جموں و کشمیر اچ انسانی حقوق دی پامالی دا نوٹس گھنے جیں اچ ہندوستانی حکومت بدترین لاک ڈاون نافذ کیتے اتے بے گناہ لوکاں کوں انسانی حقوق دی پامالی دا نشانہ بنڑایا ویندا پے ۔اے گال انہاں اج ایوان صدر اچ بین الپارلیمانی یونین (آئی پی یو) دی صدر محترمہ گیبریلا کوئیوس بیرن نال ملاقات کریندے ہوئیں آکھی اے ۔ صدر ڈاکٹر عارف علوی آکھیا جو بھارت کشمیر دے بے گناہ لوکاں تے دہشت گردی دا راج مسلط کر رکھیے اتے مقبوضہ کشمیر دے لوکاں کوں اذیت اچ مبتلا کر رکھیے ، جیرھا جو اقوام متحدہ دیاں قرارداداں دی صریحاً خلاف ورزی اے۔ انہاں امید دا اظہار کیتا جو آئی پی یو بھارتی مقبوضہ جموں و کشمیر دے لوکاں دے حقوق دے تحفظ اچ اپنڑاں کردار ادا کریسی ۔ صدر دورے تے آونر آلے معززین کوں حکومت دی سمارٹ لاک ڈاون پالیسی بارے ڈسایا جیں پاروں کووڈ۔19 وبا دے چیلنج تے قابو پاتا گیا ۔ گیبریلا کیووس بیرن آکھیا جو انہاں دا ملک سانجھے دلچسپی دے شعبیں اچ نیڑے تعلقات دے ودھارے کیتے پاکستان نال رل تے کم کرنڑ چاہندے ۔ ڈوہیں فریقین ڈوہیں ملکاں دے عوام دے سانجھے فائدے کیتے سارے شعبیں اچ ڈو پاسے تعلقات کوں مستحکم کرنڑ دی ضرورت تے زور ڈتا ۔ صدر ایں امید دا اظہار کیتا جو آئی پی یو دے صدر دا دورہ پاکستان دی پارلیمنٹ اتے آئی پی یو دے ممبر پارلیمان وچال پارلیمانی تعلقات مستحکم کرنڑ اچ معاون ہوسی ۔اجلاس اچ چیئرمین سینیٹ ، محمد صادق سنجرانی ، اتے سینیٹر مرزا محمد آفریدی وی شرکت کیتی۔
