کلیولینڈ ۔ 30 ستمبر (اے پی پی) امریکہ اچ 3 نومبرکوں تھیونڑ آلے صدارتی انتخاب کیتے ریپبلکن امیدوار اتے موجودہ صدر ڈونلڈ ٹرمپ اتے ڈیموکریٹک پارٹی دے سابق نائب صدر جوبائیڈن دے درمیان پہلے صدارتی مباحثے اچ ڈوہیں امیدواراں ہک ڈوجھے کوں سخت تنقید دا نشانہ بنڑیندے ہوئیں ہک ڈوجھے دی اہلیت تے سوال چاتے ٹی وی تے تھیونڑ آلے مباحثے کوں ذاتی لڑائی بنڑا ڈتا۔ ریاست اوہائیو دے شہر کلیو لینڈ اچ تھیونڑ آلے مباحثے دے آغاز اچ ڈوہیں صدارتی امیدواراں مصافحہ نی کیتا جیں دی وجہ کورونا وائرس دی وبا پاروں سماجی دوری دے ضابطے تے عمل درآمد کرنڑاں ہئی ۔ مباحثے اچ ڈوہیں صدارتی امیدوار ہک ڈوجھے تے تنقید تے تکرار کریندے ہوئیں نظر آئے۔ امریکی میڈیا کمپنی فاکس نیوز دے سینیئر صحافی کرس والیس مباحثے اچ میزبان دے فرائض انجام ڈتے جیں اچ اہاں ڈوہیں امیدواراں توں سوال پچھے تے انہاں کوں جواب کیتے 2، 2 منٹ دا وقت ڈتا گیا۔ پہلا مباحثہ 6 مرحلے تے مشتمل ہئی ، جیں اچ 6 سوال ہن ۔ ہر مرحلہ 15 منٹ تے مشتمل ہئی ،۔ مباحثے اچ ٹرمپ توں پہلا سوال سپریم کورٹ دے آندے چیف جسٹس دی نامزدگی دے حوالے نال کیتا گیا او انہاں کوں کیوں نامزد کر یندے پن۔ جیں تے انہاں آکھیا جو انہاں الیکشن جتے ایں کیتے انہاں کوں جج منتخب کرنڑ دا اختیار اے۔ انہاں آکھیا جو سپریم کورٹ کیتے جسٹس ایمی کونی بیرٹ دا حوالے ڈیندے ہوئیں آکھیے جو او ہر لحاظ نال چنگے ہن ۔ میں چار سال کیتے منتخب تھیاں ترائے کیتے کائناں ۔جو بائیڈن دا موقف اے جو جج دی نامزدگی الیکشن دے بعد تھیونڑیں چاہیدی اے ۔ ایں موقع تے ڈوہیں ہک ڈوجھے توں سوال پھچے جو تساں کیویں درست او ۔صحت دے نظام تے دوہیں صدارتی امید واراں جذباتی انداز اختیار کیتا۔ ایں موقع تے ڈیموکریٹ امیدوار جوبائیڈن صدر ٹرمپ توں اوبامہ ہیلتھ کیئر دے حوالے نال آکھیا جو ڈونلڈ ٹرمپ ڈے ہیلتھ کیئر متعلق کوئی پلان کائنی۔ جواب اچ ٹرمپ آکھیا جو اوباما کیئر ہک تباہی اے،۔ جو بائیڈن ٹرمپ تے الزام لاتے جو اہاں وبا تے خطرے تے پردہ پاتے ۔ جواب اچ ٹرمپ انہاں دے سیاسی کیریئر تے گال کیتی تساں 47 سال تئیں کجھ نی کیتا ۔
