اسلام آباد ۔ 27 ستمبر (اے پی پی) وزیر اعظم عمران خان خبردار کیتے جو بین الافغان مذاکراتی عمل اچ مزید اوکھ آسگدی اے تاں جو ایندے کیتے سارے فریقین کوں صبر دا مظاہرہ کرنڑاں پوسی ۔ مذاکراتی عمل اچ سست روی تے اوکھ وی آسگدی اے اتھاں تئیں جو کڈاہیں ڈیڈ لاک وی پیدا تھی سگدے کیوں جو افغان اپنڑے مستقبل کیتے رل تے کم کریندے پن ، ایجھے موقعیں تے اساں آپ دا کردار ادا کریندے ہوئیں انہاں کوں یاد ڈویندے رہ ویسوں جو مذاکرات دی میز تے بغیر کہیں خون خرابے دے ڈیڈ لاک میدان جنگ دے خون ریز حل توں کتھائیں بہتر اے ۔ وزیراعظم عمران خان اے گال واشنگٹن پوسٹ دے تازہ ترین شمارے اچ ہک آرٹیکل اچ آپنڑی صلاح ڈیندے ہوئیں آکھی اے ۔ وزیر اعظم آکھیا جو انہاں سارے فریقین کوں جنہاں افغان امن عمل اچ آپ دا حصہ پاتے انہاں کوں غیر حقیقت پسدانہ طور تے مدت مقرر کرنڑ دیاں خرابیاں کوں پرے کرنڑ کیتے آپنڑاں عمل دخل بروئے گا گھن آونڑ دی لوڑھ اے ۔ وزیر اعظم آکھیے جو افغانستان توں اقوام عالم دا وختی بیان بازی اچ انخلا غیر دانشمندانہ ہوسی۔ آرٹیکل اچ وزیر اعظم ایں گال تے زور ڈتے جو اساکوں انہاں علاقائی عناصرتوں وی بچنڑاں ہوسی جنہاں دی امن عمل اچ سرمایہ کاری کائنی او اپنڑے جغرافیائی مفادات دی خاطر افغانستان اچ عدم بدامنی ڈیکھنڑ چاہندن ۔ انہاں آکھیے جو امن دے پاسے پہلے قدم دوحہ اچ چاتا گیا ہئی ۔وزیر اعظم عمران خان ایں گال دا اعادہ کیتے جو پاکستان ہک متحدہ ، آزاد اتے خود مختار افغانستان دی جدوجہد اچ افعان عوام دی حمایت جاری رکھیسی جیں توں افغانستان دے نال نال ہمسایہ ملکاں اچ امن قائم تھیسی ۔ وزیراعظم آکھیے جو پاکستان ایں گال تے یقین رکھیندے جو امن مذاکرات اچ کوئی زور زبردستی نی ہوونڑیں چاہیدی سارے فریقین تے زور ڈیندے جو او کشیدگی کوں مکاون ۔وزیر اعظم مزید آکھیا جو جیویں جو افغان حکومت طالبان کوں ہک سیاسی حقیقت دے طور تے من گھدے امید اے جو طالبان پیشرفت قبول کریسن جیرھا جو ہنڑ افغانستان کیتی اے ۔ وزیراعظم آکھیا جو امریکہ وانگوں پاکستان وی کڈاہیں نی چاہندا افغانستان ول کڈاہیں بین الاقوامی دہشتگردی دی آماجگاہ بنڑے۔ انہاں آکھیے جڈاں توں نائن الیون سانحہ تھئے تاں 80 ہزار توں ودھ پاکستانی سکیورٹی اہلکار تے شہری دہشتگردی دے خلاف ساریں توں وڈی کامیاب ترین جنگ اچ آپ دیاں جاناں ڈے چکن ۔
