اسلام آباد۔29اکتوبر (اے پی پی):انسداد دہشت گردی دی خصوصی عدالت وزیر اعظم عمران خان کوں پارلیمنٹ حملہ کیس اچ بری کرݙتے ۔خمیس کوں انسداد دہشت گردی دی خصوصی عدالت دے جج راجا جواد عباس حسن فیصلہ سݨیندے ہوئیں وزیر اعظم عمران خان دی بریت دی درخواست منظور کریندے ہوئیں مقدمہ توں بری کرݙتے۔عدالت وزیراعظم دی مقدمہ توں بریت دی درخواست تے دلائل سݨݨ دے بعد فیصلہ محفوظ کیتا ہئی ۔عدالت حکم ݙتے صدر مملکت عارف علوی کوں صدارتی استثنیٰ پاروں انہاں دی حد تئیں کیس داخل دفتر رہ ویسی ۔عدالت فرد جرم لاوݨ کیتے وفاقی وزرا شاہ محمود قریشی، پرویز خٹک، شفقت محمود اتے اسد عمر کوں 21 نومبر کوں سݙیے ۔عدالت صوبائی وزیر علیم خان، شوکت یوسف زئی اتے جہانگیر خان ترین کوں وی آندی سماعت تے سݙ ڳھدے ۔عدالتی فیصلے موجب پاکستان عوامی تحریک دے رکن مبشر علی وی مقدمہ توں بری جݙاں جو قائد عوامی تحریک ڈاکٹر طاہر القادری بدستور اشتہاری رہسن ۔گزریل سماعت تے وزیر اعظم عمران خان ولوں انہاں دے وکیل عبداللہ بابر اعوان بریت دی درخواست اچ تحریری دلائل جمع کرائے ہن۔تحریری دلائل اچ موقف اختیار کیتا ڳیا ہئی جو عمران خان کوں کوڑے تے بے بنیاد الزام اچ پھسایا ڳے ، عمران خان دے خلاف کوئی ثبوت آئنی، نہ کہیں گواہ انہاں دے خلاف بیان ݙتے ، سیاسی مقدمہ اے جیں اچ سزا دا کوئی امکان کائنی ایں سانگے بری کیتا ونڄے ، پراسیکیوٹر وی دوران سماعت عمران خان دی بریت دی درخواست دی حمایت کریندے ہوئیں آکھیا ہئی جو عمران خان دے خلاف مقدمہ سیاسی طور تے بݨایا ڳے ،عمران خان دے خلاف مقدمہ صرف ویلھے دا ضیان اے ،عمران خان کوں بری کر ݙتا ونڄے تاں پراسیکیوشن کوں کوئی اعتراض کائنی۔
