جنیوا۔7اکتوبر (اے پی پی)عالمی ادارہ صحت دے سربراہ امید ظاہر کیتی اے جو کورونا وائرس توں بچنڑ دی ویکسین شاید اجوکے سال دے چھیکڑ تئیں ڈے ڈتی ونجے ۔ذرائع ابلاغ موجب گزریل ڈینھ عالمی ادارہ صحت دے ایگزیکٹو بورڈ دے 2 ڈینھ دے اجلاس اچ کورونا وائرس دی عالمی وبا تے عالمی ردعمل اتے جرمنی، برطانیہ اتے آسٹریلیا سودھے بئے ملکاں دی اقوام متحدہ کوں مضبوط بنڑاونڑ کیتے اصلاحات گھن آونڑ دیاں تجویزاں دا جائزہ گھدا گیا ۔ایں موقع تے عالمی ادارہ صحت دے ڈائریکٹر جنرل ٹیڈروس ایڈہانوم گیبریسس زور ڈتا جو سارے سربراہان مملکت یکجہتی دا مظاہرہ کرن تے ویکسین دی تیاری اتے فراہمی دے بعد ایندی منصفانہ ونڈ کوں یقینی بنڑایا ویسی کیوں جو کورونا وائرس توں متاثرہ پوری دنیا کوں ایندے توں بچنڑ دی ویسکین دی لوڑھ ہوسی تے امید اے جو اجوکے سال دے چھیکڑ تئیں ویکسین آونجے ۔ واضح رہے جو ایں ویلھے عالمی ادارہ صحت دیاں تیار کیتیاں گئیاں 9 ویکسینز تجرباتی مرحلے وچ ہن تے عالمی ادارہ صحت آندے سال دے چھیکڑ تئیں ڈو ارب خوراکاں ڈیونڑ دا عزم کر رکھیے ۔
