اسلام آباد۔18نومبر(اے پی پی)وفاقی وزیر صنعت و پیداوار حماد اظہر آکھیے جو موجودہ حکومت دے اقدامات نال ملک ترقی دی راہ تے ٹر پئے،ٹیکسٹائل ملاں اتے پاور لومز اپݨی مکمل صلاحیت نال چلدیاں پین، ٹیکس ریفنڈ ادائیگی 100 فیصد ودھین، صنعتی شعبہ کیتے پیکیج نال برآمدات ودھسن،پیکج اچ بجلی دے پیک آور ٹیرف مکا ݙتن، تاریخ دے سب توں وݙے کرنٹ اکاونٹ خسارہ کوں اجوکی حکومت 17 سال بعد سرپلس کر ݙتے،جیویں معیشت چنڳی تھیندی آسی غیر ضروری ٹیکسز گھت کر ݙتے ویسن۔ اے ڳالھ انہاں فیصل آباد دے برآمد کنندگان اتے تاجر برادری دی ہک تقریب اچ خطاب کریندے آکھی۔ انہاں آکھیا جو حکومت صنعتاں دی ٻحالی دا اوکھ کم کر ݙکھائے اتے معیشت وی ترقی کریندی پئی اے، ڄیھڑی حکومت دی وݙی کامیابی اے، اج صنعت، پاور لومز، مزدور دا روزگار اتے کاروبار بحال اے، حکومت ملک کوں ݙیوالا تھیوݨ توں بچائے، پاکستان دی عالمی درجہ بندی چنڳی تھئی اے، روپیا ولا تکڑا تھیندا پئے، اجوکی حکومت پچھلے قرضے وی لھیندی پئی اے اتے ٻئے وی گھنݨ گھت کر ݙتن، عالمی ادارے ورلڈ بینک، آئی ایم ایف، ایشین ڈویلپمنٹ بینک پاکستان دی تعریف کریندے پین،اساں انشا اللہ معیشت اچ مثبت رجحان قائم کر تے راہسوں۔
