اسلام آباد۔4دسمبر(اے پی پی) وزیر اعظم عمران خان دی صدارت اچ موبائل ڈیوائس مینوفیکچرنگ پالیسی دے نفاذ بارے اجلاس تھیا۔ جمعے کوں وزیراعظم دے میڈیا ونگ توں جاری بیان دے مطابق اجلاس اچ وزیرِ صنعت و پیداوار حماد اظہر، مشیرِ تجارت عبد الرزاق داؤد، مشیرِ خزانہ عبد الحفیظ شیخ، مشیر برائے ادارہ جاتی اصلاحات ڈاکٹر عشرت حسین، معاونِ خصوصی ڈاکٹر وقار مسعود، چیئرمین بی او آئی عاطف بخاری، چیئرمین ایف بی آر جاوید غنی، چیئرمین پی ٹی اے میجر ریٹائرڈ عامر عظیم باجوہ اتے ٻئے اعلیٰ حکام شرکت کیتی۔ اجلاس اچ وزارت صنعتی پیداوار ولوں موبائل ڈیوائس مینوفیکچرنگ پالیسی دے نفاذ بارے تفصیلی بریفنگ ݙتی ڳئی۔ اجلاس کوں ݙسیا ڳیا جو موبائل فون بارے پاکستان ہک ٻہوں وݙی مارکیٹ اے، ملک اچ ہرسال تقریباٍ چار کروڑ موبائل فون ڳھدے ویندن۔ اجلاس کوں ٻیا ڈسیا ڳیا جو ڈی آئی آر بی ایس سسٹم دے اطلاق دے بعد ملک توں موبائل فون اسمگلنگ ختم تھی ویسی جئیں پاروں ریونیو 22 ارب توں ودھ کراہیں 54 ارب روپے تئیں پڄ ڳئے۔ ٻیا ݙسیا ڳیا جو ایں سسٹم دے بعد ہݨ کئی انٹرنیشنل کمپنیاں پاکستان اچ مقامی سطح تے مینوفیکچرنگ سانڳے وی دلچسپی ڳھندیاں پئن۔ ایں موقع تے وزیراعظم آکھیا جو اساݙا مقصد ملک اچ صںعتی پیداوار ودھاوݨ اے۔وزیراعظم ہدایت کیتی جو باہرلی سرمایہ کاری اتے صںعتکاری دی راہ اچ آوݨ آلی رکاوٹاں کوں دور کیتا ونڄے ہر پوری سہولت ݙتی ونڄے۔
