ملتان۔14 جنوری ( اے پی پی سرائی سروس) پاکستان سرائیکی عوامی سنگت دے مرکزی سینئر نائب صدر قاسم لاشاری کراچی اچ اللہ کوں پیارے تھی ڳئے ۔ اڄ شام کوں کراچی اچ انہاں دی نماز جنازہ پڑھا ݙتی ڳئی اے جئیں اچ سرائیکی عوامی سنگت دے چیئرمین نذیر لغاری دے علاوہ کراچی اچ رہوݨ آلے شاعراں، ادیباں، دانشواراں دی وݙی تعداد شریک تھئی۔ قاسم لاشاری دی ݙوجھی نماز جنازہ 15 جنوری کوں جمعے دی نماز دے عبد انہاں دی وستی للہ آلی موری اوچ شریف اچ پڑھائی ویسی۔ مرحوم آپݨے پسماندگان اچ ݙو پتر، ہک دھی اتے ݙو بیوہ شامل ہن۔ مرحوم قاسم لاشاری دی وفات تے تعزیت کریندیں ہوئیں سرائیکستان قومی کونسل دے صدر ظہور دھریجہ آکھیا جو مرحوم دی وسیب دے حقوق اتے صوبہ سرائیکستان سانڳے ٻہوں خدمات ہن اتے انہاں دے وفات نال جیڑھا خلاف بݨ ڳئے او عرصے تئیں کائنا بھریسی۔ مرحوم قاسم لاشاری دی بیگم محترمہ کرن لاشاری مرکزی صدر سرائیکی عوامی تریمت تحریک وسیب دے حقوق سانڳے ٻہوں کم کیتے اتے ایں مقصد سانڳے قاسم خان لاشاری دی انہاں دی پوری سرپرستی رہی اے۔ وسیب دے لوک ہمیش انہاں دی خدمات کوں یاد رکھیسن۔ دعا اے جو اللہ سئیں مرحوم دی مغفرت فرماو اتے انہاں دے ٹٻر کوں صبر ݙیوے۔
