اسلام آباد۔18مارچ (اے پی پی):صدرِ مملکت ڈاکٹر عارف علوی سرمایہ کاری دے ودھارے تے تجارتی سرگرمیاں کوں ودھاوݨ کیتے کاروبار کوں سوکھا تے اصلاحات دی لوڑھ تے زور ݙیندے ہوئیں آکھیے جو تجارتی سرگرمیاں کوں ودھاوݨ کیتے ٹیکنالوجی دا ودھ توں ودھ استعمال ناگزیر اے، صنعت کاراں دی مشاورت توں ٹیکسٹائل انڈسٹری دی بحالی ممکن تھی سڳی اے ، اے ڳالھ انہاں جمعے کوں ایوانِ صدر اچ ”آسان کاروبار پروگرام” دے حوالے نال منعقدہ تقریب توں خطاب کریندے ہوئیں آکھی اے ۔ تقریب اچ وزیراعظم دے مشیر تجارت اتے سرمایہ کاری عبدالرزاق دائود، بورڈ آف انوسٹمنٹ دے چیئرمین محمد اظفر احسن، غیرملکی سفارت کاراں، تاجرتنظیماں دے نمائندیں تے اعلیٰ افسران شرکت کیتی۔ صدرِمملکت آکھیے جو ملک اچ سرمایہ کاری دے ودھارے کیتے کاروبارکوں سوکھا کریندے پیوں ،کاروبار اچ سوکھ کیتے رویں اچ تبدیلی گھن آوݨی ہوسی ،ملک اچ سرمایہ کاری اتے کاروبار توں روزگار دے نویں مواقع پیدا تھیسن ۔ ڈاکٹر عارف علوی ایں موقع تے کاروبار بارے پورٹل دے اجراء دی تعریف کریندے ہوئیں آکھیے جو ایندے توں تاجراں تے سرمایہ کاراں کوں پاکستان اچ تجارت بارے آگاہی ملسی ۔
