اسلام آباد۔22مارچ (اے پی پی) وزیراعظم عمران خان آکھیا جو دنیا دے ݙیڈھ ارب مسلماناں کوں کہیں بلاک اچ ونݙݨ اتے تنازعیاں اچ الجھݨ دی بجائے امن کیتے آپݨی طاقت نشابر کرݨی چاہیدی اے، بنیادی ایشوز تے او آئی سی کوں ہک متحدہ فرنٹ ٻݨاوݨا پوسی۔ اساں تنازعیاں دے نی امن دے سانھے دار ہیسے، دنیا اچ اسلام صرف ہکو اے، اسلامی اقدار کوں جیڑھے خطرات ایں ویلھے ہن ماضی اچ کائنا ہن، انہاں دے تحفظ کیتے اقدامات کرݨے چاہیدن۔ عالمی قوانین اقوام متحدہ دی سلامتی کونسل دی قرارداداں دے باوجود فلسطین اتے کشمیر دے مسلماناں کوں انہاں دےبنیادی حق توں محروم رکھیا ویندا پئے۔ اسلاموفوبیاکے تدارک کیتے 15 مارچ دا جڳ ݙیھاڑ مناوݨ دی تاریخ قرارداد دی منظوری مسلم امہ دی وݙی کامیابی اے، مسلم ملکاں کوں آپݨی خارجہ پالیسی اچ کور ایشوز تے مفتق تھی تے ودھݨ دی لوڑھ اے۔ روس یوکرین جنگ اچ اوآئی سی ثالثی کردار ادا کر سڳدی اے۔ ایں تنازعے نال دنیا چ پٹرول اتے کنڑک دے نرخ ودھین۔ ہک مستحکم افغانستان عالمی دہشت گردی کوں روکݨ دا ہکو راہ اے۔ او منگل کوں اسلامی تعاون تنظیم (او آئی سی ) دے وزرائے خارجہ کونسل دے 48 ویں اجلاس دے افتتاحی سیشن توں خطاب کریندے پئے ہن۔ وزیراعظم آکھیا جو اسلاموفوبیاکے تدارک کیتے 15 مارچ دا جڳ ݙیھاڑ مناوݨ دی تاریخ قرارداد دی منظوری مسلم امہ دی وݙی کامیابی اے۔15 مارچ کوں نیوزی لینڈ اچ ہک مسلح بندے مسیت اچ وڑ تے پنڄاہ مسلماناں کوں شہید کیتا۔ نائن الیون دے بعد اسلام کوں دہشت گردی نال جوڑیا ڳیا۔ ایں ویلھے مسلم ملکاں دے حکمراناں ایں ٹھوس موقف اختیار کرݨ دی بجائے آپݨے آپ کوں روشن خیال اتے اعتدال پسند قرار ݙتے۔ اسلام آباد کوں دہشت گردی نال جوڑݨ دی عمل اچ ساریاں توں ودھ مغرب اچ مسلمان متاثر تھین۔ اتھاں دہشت گردی دے بعد فوری الزام اسلام تے لاتا ڳئے۔ پہلی واری اے منیا ڳئے جو اسلاموفوبیا ہک نفرت انگیز شئے اے۔ وزیراعظم آکھیا جو جڑیھے ملکاں ریاست مدینہ دے اصول اپنائن او خوشحال تھین، ریاست مدینہ دنیا دا وݙا انقلاب ہئی۔ نبی پاکﷺصرف مسلماناں کیتے نی پوری امت کیتے رحمت اللعالمین ہن۔ اقوام متحدہ دی رپورٹ دے مطابق سالانہ 1.6 ارب ڈالرز انہاں ملکاں توں کݙھیے ویندن، ترقی پذیر ملکاں اچ غربت وسائل دی ڳھٹکی کرپشن پاروں اے۔ قائداعظم ایں ملک کوں اصل ریاست مدینہ ٻݨاوݨ چاہندے ہن۔ انہاں آکھیا جو مغرب اچ آپݨے زناوراں دا اتنا خیال رکھیا ویندے جتنا اساں آپݨے انساناں دا وی نی رکھندے۔ سوئٹزرلینڈ آپݨے 99 فیصد وسائل نہ ہووݨ پاروں دنیا دا خوشحال ملک اے۔ وزیراعظم آکھیا جو تریمتیں کوں انہاں دا حق ݙیوݨ نبی اکرم خاتم النبین ﷺ ولوں ہک انقلابی قدم ہئی۔ بدقسمتی نال پاکستان اچ ستر فیصد تریمتیں کوں وراثت اچ حق نی ݙتا ویندا، اساں ایں بارے قانون سازی کیتی اے۔
