اسلام آباد۔28اپریل(اے پی پی)چیف الیکشن کمشنر سکندر سلطان راجہ دی سربراہی اچ الیکشن کمیشن دے ترائے رکنی بنچ تحریک انصاف دے 20 منحرف ارکان دے خلاف سپیکر دی طرفوں بھجوائے ڳئے نااہلی ریفرنس دی سماعت 6 مئی تئیں ملتوی کریندے ہوئیں انہاں ارکان توں تحریری جواب منگ ڳھدے۔ چیف الیکشن کمشنر آکھیے جو ریفرنس دا فیصلہ 30 ݙینھ اچ کر گھنسوں۔ کمیشن نورعالم خان دے وکیل دے کمیشن دے دائرہ اختیار تے چاتے اعتراض تے فیصلہ وی محفوظ کرڳھدے۔ رکن قومی اسمبلی نور عالم خان دے وکیل بیرسٹر گوہر اعتراض کیتا جو الیکشن کمیشن دے ارکان پورے کائنی، منحرف ارکان دے خلاف ریفرنس مکمل بنچ ہی سݨ سڳدے، کمیشن مکمل نہ ہووݨ تے 63 اے دا کیس نی سݨ سڳدا۔ نورعالم خان پارٹی پالیسی دے خلاف ووٹ نی ݙتا۔ منحرف اقلیتی رکن رمیش کمار آکھیے جو انہاں نہ پارٹی چھوڑی، نہ پارٹی پالیسی دے خلاف ووٹ ݙتے۔ تحریک انصاف دے وکیل آکھیے جو الیکشن کمیشن کوں مکمل کرݨ پارلیمنٹ دی ذمہ واری اے، الیکشن کمیشن دے دائرہ اختیار تے اعتراض نی چاتا ونڄ سڳدا۔ الیکشن کمیشن دے دائرہ اختیار تے چاتے ڳئے اعتراض تے فیصلہ محفوظ کرڳھدے جݙاں جو منحرفین ارکان دے خلاف ریفرنس دی سماعت 6 مئی تئیں ملتوی کریندے ہوئیں ارکان کوں ہدایت کیتی اے جو 6 مئی تئیں اپݨا تحریری جواب جمع کراون۔
