اسلام آباد۔4جون (اے پی پی):وزیراعظم شہباز شریف آکھیے جو تحریک انصاف دی حکومت گوادراچ پاݨی تے بجلی دا کوئی وی منصوبہ مکمل کرݨ اچ ناکام رہی، ارباں روپے تے قیمتی وقت ضائع کیتے، گوادر ائیر پورٹ اتے گوادر بندرگاہ دی صورتحال چنڳی کائنی ، پاکستان دی ترقی بلوچستان اچ امن ، استحکام اتے ترقی نال جڑی اے ، ہفتے کوں آپݨے ھک ٹویٹ اچ وزیراعظم آکھیے جو گوادر دے دورے دے دوران میں ݙٹھے جو کیویں پی ٹی آئی حکومت گوادر دے لوکاں کوں مایوس کیتے۔ ارباں روپے اتے قیمتی وقت ضائع کیتا ڳئے ۔ گوادر دی بندرگاہ کیتے وݙیاں قربانیاں ݙیوݨ آلے مقامی لوکاں کیتے پاݨی و بجلی دے مسئلیں دے حل کیتے کوئی وی منصوبہ مکمل نی کیتا ونڄ سڳیا۔ وزیراعظم آکھیے جو گوادر دی بندرگاہ تے گوادر ہوائی اݙے دی تعمیر دی صورتحال وی ٹھیک کائنی۔ بندرگاہ تے کوئی ڈریجنگ نی کیتی ڳئی جیں دی وجہ توں کوئی وݙا کارگو جہاز لنگر انداز نی تھی سڳدا ۔ وزیراعظم آکھیے جو گوادر یونیورسٹی، ایئرپورٹ اتے پیوݨ دے صاف پاݨی کیتے ڈی سیلی نیشن پلانٹ دی تنصیب دی جلدی تکمیل دا حکم ݙتے ۔ انہاں آکھیے پاکستان دی مجموعی ترقی بلوچستان دے امن، استحکام تے ترقی نال جڑی اے۔ اتحادی حکومت بلوچستان دی صوبائی حکومت اتے مقامی عمائدین نال رل تے مستقبل دے لائحہ عمل دے تعین کیتے پرعزم اے۔
