مکمل انسان کیتے تعلیم دے نال تربیت ضروری اے، صدر  ڈاکٹر عارف علوی

اسلام آباد۔5جولائی  (اے پی پی):صدر مملکت ڈاکٹر عارف علوی نینگراں کوں جدید تعلیم دے زیور توں آراستہ کرݨ دی لوڑھ تے زور ݙیندے ہوئیں آکھیے جو ھک مکمل انسان کیتے تعلیم دے نال تربیت وی ضروری اے ۔صدر مملکت اے ڳالھ غلام اسحاق خان انسٹیٹیوٹ دے 26 ویں کانووکیشن توں آپݨے خطاب اچ آکھی اے ۔ انہاں آکھیے جامعات تے معاشرہ اخلاقیات تے اقدار تے خصوصی توجہ ݙیوے ، اساکوں آپݨے تعلیمی نظام کوں بہتر توں بہتر بݨاوݨ تے آپݨی توجہ ݙیوݨی ہوسی ۔ صدر آکھیے انسانی وسائل تے اذہان دی ترقی علم نال جڑی اے ، طلباء تعلیم دے نال نال رابطے تے زبان و بیان دیاں صلاحیتاں ودھاوݨ تے توجہ ݙیون ۔ صدر ڈاکٹر عارف علوی آکھیے زمانے اچ تکھے ظہور پزیر تھیوݨ آلیاں تبدیلیاں کوں سمجھݨا ہوسی، ٹیکنالوجی دی مدد توں علم تئیں رسائی ودھ چکی اے ، انہاں آکھیے انسان دی تجزیہ کاری اتے فیصلہ سازی دیاں صلاحیتاں بُنیادی اہمیت اختیار کر ڳئن ، قدرتی وسائل دی نسبت انسانی تے فکری وسائل دی اہمیت ودھ ڳئی اے۔ صدر مملکت آکھیے موجودہ دور اچ علم ترقی دا واحد رستہ اے، پاکستان کوں ہنر مند تے تربیت یافتہ انسانی وسائل دی لوڑھ اے ، جامعات معیاری انسانی وسائل دی زیادہ تعداد پیدا کرن۔ صدر آکھیے انفارمیشن ٹیکنالوجی دے شعبے اچ پاکستان سالانہ تقریباَ 30 ہزار طلباء پیدا کریندے ، ہنر مند نینگر آن لائن خدمات دی مدد توں روزگار کمیندے پئن ۔ ڈاکٹر عارف علوی آکھیے پاکستان کوں اخلاقیات دے لحاظ نال وی برتری حاصل اے، پاکستان 40 سال تئیں 40 لکھ افغان پناہ گزیناں کوں پناہ ݙتی ، پاکستان اچ زلزلے تے سیلاب دی صورت اچ عوام ودھ چڑھ تے فلاحی کماں اچ حصہ پیندن ۔