قابض بھارتی افواج دا ظلم و ستم، بھونڈے ہتھکنڈے کشمیریاں دی مقامی تحریک آزادی دبا سڳی اے نا دبا سڳسی، صدرمملکت ڈاکٹر عارف  علوی

اسلام آباد۔13جولائی(اے پی پی)صدر مملکت ڈاکٹر عارف علوی حقِ خودارادیت اتے آزادی دی جدوجہد جاری رکھݨ آلے کشمیر دے بہادر، غیور عوام اتے شہداء کوں خراج عقیدت پیش کریندے آکھیے جو قابض بھارتی افواج دا ظلم و ستم، بھونڈے ہتھکنڈے کشمیریاں دی مقامی تحریک آزادی دبا سڳی اے نا دبا سڳسی، اقوام متحدہ دی قرارداداں اتے کشمیری عوام دی امنگاں دے مطابق تنازعہ کشمیر دا حل ہی خطے اچ پائیدار امن دی ضمانت اے۔ اے ڳالھ انہاں یومِ شہدائے کشمیر تے سنیہے اچ آکھی۔ صدر مملکت آکھیا جو یوم شہدائے کشمیر تے اساں 13 جولائی 1931 ء کوں ڈوگرہ سامراج دے ہتھو شہید تھیوݨ آلے کشمیریاں دے عزم کوں سلام پیش کریندے ہیں، ایں ڈینھ اساں حقِ خودارادیت اتے آزادی دی جدوجہد جاری رکھݨ آلے بہادر کشمیری غیور عوام  اتے شہیداں کوں وی سلام پیش کریندے ہیں۔