آئی ایم ایف نال معاہدے توں بعد اتحادی حکومت دا ہر فیصلہ عوام کوں سوکھ ݙیوݨ دا ہوسی، وفاقی وزیر خزانہ مفتاح اسماعیل

اسلام آباد۔14جولائی(اے پی پی)وفاقی وزیر خزانہ مفتاح اسماعیل آکھیے جو وزیراعظم شہباز شریف دی اڳواݨی اچ محنت نال آئی ایم ایف نال ہک چنڳاں معاہدہ کر ڳھدے، آئی ایم ایف ’’سستا پٹرول سستا ڈیزل‘‘ سکیم، بے نظیر انکم سپورٹ پروگرام اتے غریب دوست پالیسیاں دی تعریف کیتی اے۔ انہاں آکھیے جو اے عوام کیتے خوشخبری اے اتے انہاں کوں مبارک تھیوے جو آئی ایم ایف قرض ݙیندا پئے، جیکر ٹیم اہل ہووے، نیت صاف اتے ارادے پکے ہوون تاں کارکردگی اتے عوام دی خدمت اچ بہتری آ سڳدی اے، اساں بیا ٹیکس کٹھا کریسوں، ٻئی محنت کریسوں، اتے عوام کوں ودھ سوکھ ݙے تے ملکی معیشت اپݨے پیریں تے کھڑی کریسوں۔ میں ایں کامیابی تے اتحادی حکومت اتے ایندے نال کھڑیاں جماعتاں کوں مبارک ݙینداں جو انہاں اوکھے فیصلے اچ ہتھ ونݙائے، عالمی منڈی اچ تیل دا ملھ ڳھٹݨ دا فیدہ عوام کوں ݙیسوں، ہݨ عوام کوں ودھ ریلیف ݙیوݨ دا ویلھا آڳئے۔