ملتان اچ یوم عاشورتے قدیمی استاد شاگرد دے تعزیں سودھے 117ماتمی جلوس برآمد

ملتان۔9اگست  (اے پی پی):ملتان شہر سودھے پورے ضلع اچ علم ،ذوالجناح اتے تعزیے دے روایتی جلوس برآمد تھئن جیڑھے جو آپݨے مقررہ رستیں توں تھیندے ہوئیں اختتامی منزلاں دے پاسے ٹردے پئن ملتان اچ 130مجالس عزامنعقد تھئن جنہاں اچ ذاکرین تے علماءکرام فلسفہ شہادت تے روشنی پاتی اتے حضرت امام حسین تے انہاں دے جانثاراں کوں خراج عقیدت پیش کیتا ڳئے ۔ 27مجالس کوں حساس قرارݙتا ڳیا ہئی ۔ یوم عاشور دے موقع تے مجموعی طورتے 117ماتمی جلوس کڈھیے ڳئن انہاں اچوں 21جلوس  اے کیٹگری اچ رلائے ڳئے ہن ، ملتان اچ تعزیں دا ساریں توں وݙا جلوس استاد شاگرد دے تاریخی تعزییں دی قیادت اچ برآمد تھئے۔چوک حرم گیٹ تے مختلف تعزیں دی صف بندی تھئی جیں توں بعد شاگرد دا تعزیہ واپس اپݨے آستانے دے پاسے چلیا ڳیا جݙاں جو باقی جلوس مقررہ روٹ دے پاسے روانہ تھی ڳئن ۔ایں طرح گھنٹہ گھر اچ وی مختلف ماتمی جلوس جمع تھئے جتھاں عزاداراں نماز ظہرین پڑھی تعزیئے دے جلوس اہل سنت دی طرفوں وی کڈھیے ڳئن جنہاں اچ استاد آلا تعزیہ ،شاگردآلا ،رمضان آلا،بکو خان آلا،بھیڈی پوتراں،گیلانی آلا،لودھی آلا،سلیم الدین آلا،رشید آلا اتے احمد بخش آلا قابل ذکر ہن۔انہاں اچوں ٻہوں سارے تعزیئے دربار پاک مائی تے مک ویسن ۔اہل تشیع دی طرفوں برآمدتھیوݨ آلے 36تعزیں دے جلوس کربلا شاہ شمس تے مک ویسن ۔اے  جلوس آستانہ لعل شاہ،ناصرہ آباد،امام بارگاہ جوادیہ،حویلی مر ید شاہ،سورج میانی،شیرشاہ،حسین آباد،آستانہ کوڑے شاہ،تھلہ سادات،لال کرتی،کمنگراں آلا،کالے منڈی اتے ٻیاں جہیں توں  برآمد تھئے ۔ایں موقع تے ریسکیو 1122،محکمہ صحت تے سول ڈیفنس دی طرفوں مختلف جاہواں تے طبی کیمپس وی لاتے ڳئے ہن ۔میپکو ،واسا تے ٻئے اداریں دے اہلکاروی موجودہن ۔جلوس دے سارے رستیں کوں سیل کرݙتا ڳیا ہئی سکیورٹی اہلکاراں دی باری نفری تعینات ہئی ماتمی جلوساں تے مجالس دی سکیورٹی تے امن وامان دی صورتحال کوں برقراررکھݨ کیتے ضلع ملتان پولیس دے کل4293پولیس افسران و اہلکاراں سکیورٹی دے فرائض انجام ݙتے ۔