اساکوں پاکستان دے معماراں دے نظریات توں راہنمائی گھندے ہوئیں قومی تعمیرِ نو کیتے لوکاں دی ݙلاح کوں آپݨی اولین ترجیح بݨاوݨاں ہوسی ، وزیر اعظم محمد شہباز شریف دا آزادی دے ݙینھ تے پیغام

اسلام آباد۔14اگست (اے پی پی):وزیر اعظم محمد شہباز شریف آکھیے جو 75 واں یومِ آزادی پوری پاکستانی قوم کیتے ھک تاریخی ݙینھ اے ، اڄ دے ݙینھ پوری قوم، برصغیر دے مسلماناں کوں مملکتِ خداداد پاکستان دے قیام کیتے بے مثال جدوجہد تے خراجِ تحسین اتے لازوال قربانیاں تے نظرانہِ عقیدت پیش کریندی اے ، قیامِ پاکستان بابائے قوم، قائدِ اعظم محمد علی جناح دی مقصد کیتے لڳن، عزمِ صمیم، انتھک محنت اتے جدوجہد دی وجہ توں ممکن تھئے، 1930 اچ تصورِ پاکستان پیش تھیوݨ توں بعد صرف 17 سال دی گھٹ مدت اچ پاکستان دنیا دے نقشے تے ساریں توں وݙی فلاحی اسلامی مملکت دے طور تے معرضِ وجود اچ آیا، پاکستان دا قیام کہیں معجزے توں گھٹ نہ ہئی جیں دوست و دشمن ساریں کوں نہ صرف حیرت اچ پاݙتا بلکہ ساریاں ڳالھیں تے پیش گوئیاں دے بر عکس دنیا اچ آپݨی انفرادی حیثیت کوں قائم رکھیا۔پاکستان دے 75ویں یوم آزادی دے موقع تے قوم دے ناویں آپݨے سنھیے اچ وزیر اعظم محمد شہباز شریف آکھیے جو جتھاں75 واں یومِ آزادی بے پناہ مسرت اتے جشن دا باعث اے، اتھائیں اے اجتماعی اتے انفرادی سطح تے خود احتسابی دا وی ھک موقع اے۔ وزیر اعظم آکھیے جو بطور قوم اساں ساڈھے ست ݙھکیں اچ کامیابیاں دے ٻہوں سارے سنگِ میل پار کیتن ، ساݙی سالمیت تے ٻاہرلے حملیں دے منہ بھن جواب توں گھن تے ھک متفقہ قومی آئین دے قیام، دنیا دی ستویں نیوکلیئر طاقت اتے دہشت گردی نال مقابلہ کرتے اجتماعی طور تے اینکوں ہرا ݙیوݨ تئیں آپݨی جہد مسلسل توں ایں ملک دی نہ سرف حفاظت کریندے آیوں بلکہ ݙینھ رات ایندی ترقی تے خوشحالی کیتے کوشاں رہیوں ، انہاں آکھیے شروع ݙینھ توں ایں ملک کوں مصیبتاں دا سامݨا رہیا مگر ساݙی بہادر قوم دے جذبے دے اڳوں مصیبتاں آپݨے ڳوݙے ٹیک ݙتے لیکن اے وی ھک پکی حقیقیت اے جو سماجی تے معاشی برابری ، قانون دی حکمرانی تے مساوات تے مبنی جیں مملکت خداداد دا خواب ساݙے وݙیں ݙٹھا ہئی اینکوں حالی تئیں پوری طرح شرمندہ تعبیر نی کرسڳیے ۔وزیر اعظم محمد شہباز شریف آکھیے اساں اڄ ھک آزاد ملک اچ ساہ گھندے پیوں جیں کیتے اساں ربِ بزرگ و برتر دا جتنا وی شکر ادا کروں گھٹ اے ، لیکن حقیقی آزادی لوڑھاں، بھک، افلاس تے پسماندگی توں آزادی دا ناں اے ، جݙاں تئیں اساں معاشی طور تے ھک خودمختار ریاست نی بݨدے ، او تئیں پوری آزادی دا خواب حقیقت بݨݨ توں محروم رہسی ، انہاں آکھیے کہیں وی قوم کیتے اندرلے خلفشار، سانجھی ونڈ تے انتشار توں ودھ تے کوئی چیز وی خطرناک نی تھی سڳدی ، کیوں جو ایجھے منفی عناصر نہ صرف ملی وحدت تے قومی سالمیت کوں ضیان پڄیندن بلکہ معاشرے کوں ایندے مقصد توں محروم کر ݙیندن ، قائدِ اعظم کوں انہاں دا چنڳی طرح پتہ ہئی ایں کیتے انہاں اساکوں انہاں دے سدِ باب کیتے ایمان اتحاد تے نظم و ضبط دا سبق پڑھایا۔ وزیر اعظم آکھیے ساݙے ملک دی ساریں توں وݙی طاقت ساݙے لوک ، بالخصوص باصلاحیت نینگر ہن ، انہاں دی لڳن، ہمت اتے تعمیری توانائیاں وں بھرپور جذبہ کہیں وی قسم دی اوکھ کوں پار کرتے امید دی شمع ٻالݨ دی صلاحیت رکھیندے ، وزیراعظم آکھیے 75 واں جشنِ آزادی منیندے ویلھے اساکوں پاکستان دے بݨاوݨ آلیں دے نظریات توں راہنمائی گھندے ہوئیں قومی نویں سروں تعمیرِ کیتے لوکاں دی فلاح کوں اپݨی اولین ترجیح بݨاوݨا ہوسی ، آؤ رل تے عہد کروں جو پاکستان کوں آپݨے وݙیں دے نظریات دے عین مطابق ھک فلاحی ریاست بݨیسوں ۔ وزیر اعظم محمد شہباز شریف آکھیے جو 75 ویں جشنِ آزادی دے تاریخی ݙینھ دے موقع تے میں پوری قوم اتے سمندروں پار پاکستانیاں کوں دلوں مبارخ ݙینداں ، پاکستان، پائندہ باد۔