ریڈیو اتے پاکستان دا جنم نال نال تھئے، ریڈیو پاکستان دی آواز اتے پاکستانیت دی علامت اے، ریڈیو معاشرے اچ اعتدال پسند رویں کوں ودھارا ݙتے ، وفاقی وزیر اطلاعات مریم اورنگزیب دی ریڈیو پاکستان دے اہتمام نال تقریب اچ ڳالھ مہاڑ

اسلام آباد۔17اگست (اے پی پی):وفاقی وزیر اطلاعات و نشریات مریم اورنگزیب آکھیے جو ریڈیو اتے پاکستان دا جنم نال نال تھئے، ریڈیو پاکستان دی آواز اتے پاکستانیت دی علامت اے، ریڈیو معاشرے اچ اعتدال پسند رویں کوں ودھارا ݙتے۔ریڈیو دے کردار اچ کمی توں معاشرے اچ انتہا پسند رویئے ودھئن ، اے ڳالھ انہاں ریڈیو پاکستان دے اہتمام نال قیام پاکستان اتے ریڈیو پاکستان دی ڈائمنڈ جوبلی دے موقع تے منعقدہ تقریب اچ ڳالھ کریندے ہوئیں آکھی اے ، تقریب اچ ریڈیو پاکستان دے سینئر فنکاراں، صدا کاراں، لکھاریاں، شاعراں، موسیقاراں تے ٻئے شعبیں توں تعلق رکھݨ آلے لوکاں کوں خاص طور تے سݙیا ڳیا ہئی ۔ وفاقی وزیر اطلاعات آکھیے جو ریڈیو پاکستان دے سینئر آرٹسٹ ساݙا اثاثہ ہن، اساکوں انہاں دے ہنر تے صلاحیتاں توں فیدہ چاوݨاں چاہیدے ، انہاں آکھیے جو سینئر آرٹسٹاں دے بغیر ساݙی ڈائمنڈ جوبلی دی تقاریب مکمل نی تھیندیاں ۔ ایں موقع تے وفاقی وزیر اطلاعات مختلف کیٹیگریز اچ منتخب تھیوݨ آلے لوکاں اچ ایوارڈز وی ݙتن۔ وفاقی وزیر اطلاعات سینئر آرٹسٹاں دے نال رل تے پاکستان دی سالگرہ دا کیک کٹیا اتے انہاں کوں خراج تحسین پیش کیتے۔ تقریب اچ قیام پاکستان توں گھن تے ہݨ تئیں ریڈیا پوکستان تے چلݨ آلے قومی ترانے ، ملی نغمیں دیاں جھلکیاں تے خصوصی پرفارمنس وی پیش کیتیاں ڳئن، وفاقی وزیر اطلاعات ایں موقع تے ریڈیو پاکستان دی انتطامیہ اتے سینئر آرٹسٹاں کوں پاکستان دی سالگرہ دی مبارخ ڈتی۔ تقریب اچ ڈائریکٹر جنرل ریڈیو سہیل علی خان، پرنسپل انفارمیشن آفیسر مبشر حسن سودھے وزارت اطلاعات و نشریات دے ٻئے اعلیٰ حکام وی موجود ہن ۔