موسمیاتی تبدیلی پاروں اڄوکی بارشاں نال پاکستان ساریاں توں ودھ متاثر تھیے، وفاقی وزیر پروفیسر احسن اقبال دی چیئرمین این ڈی ایم اے دے رلے سانجھی پریس کانفرنس

اسلام آباد۔17اگست (اے پی پی) وفاقی وزیر منصوبہ بندی ، ترقی تے اصلاحات پروفیسر احسن اقبال آکھیا جو موسمیاتی تبدیلی پاروں اڄوکی بارشاں نال پاکستان ساریاں توں ودھ متاثر تھیے۔ اےڳالھیں انہاں بدھ کوں چیئرمین این ڈی ایم اے لیفٹیننٹ جنرل اختر نواز دے رلے سانجھی پریس کانفرنس توں خطاب کریندیں ہوئیں آکھی۔ احسن اقبال آکھیا جو بارشاں توں متاثرہ لوکاں دے مالی تعاون کریندے پیوں۔ بارشاں توں متاثرہ صوبیاں اچ انفراسٹرکچر دی بحالی کیتے کم کریندے پیوں۔ احوکے سیلاب نال تھیوݨ آلے ضیان دا اندازہ لاوݨ کیتے وفاقی اتے صوبائی حکومتاں سانجھے سروے کریسن۔ انہاں آکھیا جو مستقبل اچ آفات پاروں تھیوݨ آلے نقصان کوں ڳھٹ کرݨ کیتے موسمیاتی صورتحال دے مطابق انفراسٹرکچر بݨاوݨ کیتےترقیاتی سانجھے داری دے سامھے منصوبے وی پیش کیتے ویسن۔ وفاقی وزیر آکھیا جو وفاقی حکومت سیلاب اچ آپݨے پیاریاں کوں ونجݨ آلیاں کوں ݙاہ لکھ روپے معاوضہ ݙیوݨ دا اعلان کیتے ۔ انہاں آکھیاجو اے معاوضہ 80 فیصد لوکاں کوں ݙتا ڳئے۔ احسن اقبال آکھیا جو وزیراعظم شہباز شریف وی بلوچستان دےسیلاب زدہ علاقیاں کیتے فوری طور تےخصوصی پیکیج جاری کرݨ دا فیصلہ کیتے۔ آفت زدہ علاقیاں اچ بے نظیر انکم سپورٹ پروگرام دے معیار تے پورا لہݨ آلے ٹٻراں کوں ہک پیکیج ݙتا ویسی تانجو او راشن سمیت آپݨی ہنگامی لوڑھ کوں پورا کر سڳن۔ ایں موقع تے چیئرمین این ڈی ایم اے لیفٹیننٹ جنرل اختر نواز آکھیا جو سیلاب توں ہݨ تئیں 630 بندے ہلاک اتے 1130 زخمی تھین۔ ایں آفت نال 72 ہزار پنج سو مکاناں دا ضیان تھیے۔ 8 ہزار ست سو بندیاں کوں بچا تے محفوظ ڄاہ تے پڄا ݙتا ڳئے۔ امدادی کیمپ لاتے ڳئن اتے متاثرہ لوکاں کوں راشن ݙتا ویندا پئے اتے طبی ݙیکھ بھال کیتے وی انتظامات کیتے ویندے پئن۔