پولیو توں پاک پاکستان قومی مقصد، قوم ملک توں پولیو دے خاتمے کیتے پولیو ٹیماں نال تعاون کرے، وزیراعظم محمدشہبازشریف

اسلام آباد۔19اگست (اے پی پی) وزیراعظم محمدشہبازشریف آکھیا جو پولیو توں پاک پاکستان قومی مقصد، قوم ملک توں پولیو دے خاتمے کیتے پولیو ٹیماں نال تعاون کرے۔ اے ڳالھیں انہاں پولیو دے خاتمے بارے قومی ٹاسک فورس دے اجلاس دی صدارت کریندیں ہوئیں آکھی۔ وزیراعظم آکھیا جو پولیو فری پاکستان قومی مقصد اے، پوری قوم توں اپیل اے جو او ملک توں پولیو دے خاتمے کیتے پولیو ٹیماں نال تعاون کرے۔ ساری قوم ڈیوٹی وچال شہید تھیوݨ آلے فوجیاں، پولیس کانسٹیبلاں اتے پولیو ورکرز کوں خراج عقیدت پیش کریندی اے۔ وزیراعظم پاکستان اچ پولیو وائرس دے کھنݙاؤ کوں روکݨ کیتے عملی اقدامات کرݨ کیتے آپݨی حکومت دا پورا عزم کیتا۔ وزیراعظم آکھیا جو اڄوکے موسمی ھالات ویکسی نیشن کیتے ٻہوں چیلنجز ہن۔ پر اے ݙیکھݨ قابل تحسین اے جو کے پی کے دے مختلف علاقیاں اچ سیلاب اتے کراچی اچ طوفانی بارشاں دے باوجود پولیو ٹیماں چنڳا کم کیتے۔ کراچی اتے جنوبی خیبرپختونخوا دے چھی ضلعیاں اچ انسداد پولیو دی اڄوکی مہم 15 اگست توں شروع تھی ہئی اتے ملک دے ٻئے علاقیاں اچ اے مہم 22 اگست توں شروع تھیسی۔ وزیراعظم بین الاقوامی امدادی ادارے اتے سانجھے داراں خصوصی طور بل اینڈ میلنڈا گیٹس فاؤنڈیشن دا وی شکریہ اد کیتا جیڑھے وائرس کوں روکݨ کیتے پاکستان دی مدد کریندے پئن۔ ایں توں پہلے وزیراعظم بالاں کوں پولیو دے قطرے پلا تے انسداد پولیو مہم دا آغاز کرݨ دے موقع تے آکھیا جو وفاق اتے صوبے رَل تے پولیو دے موزی مرض دا خاتمہ کریسن۔ وزیراعظم وفاقی وزیرصحت ، وزیراعلیٰ سندھ ، سارے صوبائی حکومتاں، کشمیر اتے گلگت بلتستان دا وی شکریہ ادا کیتا جو او پولیو دے خلاف مہم اچ بھرپور کردار ادا کریندے پئن۔