سعودی عرب ، متحدہ عرب امارات ، چین اتے قطر دا مالی تعاون پاکستان کوں معاشی بحران توں کڈھݨ اچ مدد ݙیندا پئے،حافظ طاہر محمود اشرفی

اسلام آباد۔23اگست (اے پی پی):پاکستان علما ء کونسل دے چیئرمین حافظ محمد طاہر محمود اشرفی آکھیے جو دوست ملکاں پاکستان کوں کݙاہیں مایوس نی کیتا۔ سعودی عرب ، متحدہ عرب امارات ، چین اتے قطر دا مالی تعاون پاکستان کوں معاشی بحران توں کڈھݨ اچ مدد ݙیندا پئے ، امداد دی بجائے تجارت اتے سرمایہ کاری تے توجہ ݙیوݨی ہوسی ،عالم عرب عالم اسلام توں آوݨ آلے سرمایہ کاراں کوں سہولت تے اعتماد ݙیوݨ نال 20 توں 30 ارب ڈالر دی سرمایہ کاری ممکن تھی سڳدی اے ، قطر اچ فٹ بال ورلڈ کپ اے ، پاکستان دے نال سیکورٹی دا معاہدہ اساں کیتے فخر دی ڳالھ اے ۔ اعلامیہ موجب اے ڳالھ حافظ محمد طاہر محمود اشرفی قطر اچ عرب ذرائع ابلاغ نال ڳالھ مہاڑ اچ آکھی اے ، انہاں آکھیے جو قطر پاکستان تعلقات ݙو قوماں تے ݙو ملکاں دے تعلقات ہن، پاکستان اچ داخلی تبدیلی اتے حالات توں تعلقات تے کوئی اثر نی تھیندا ۔ وزیر اعظم شہباز شریف دے دورہ قطر نال پاکستان اتے پاکستانیاں کیتے ٻہوں سارے موقع پیدا تھیسن۔ قطر اچ پہلے وی پاکستانیاں دی ھک وݙی تعداد روزگار کیتے موجود اے۔