وزیرِ اعظم شہباز شریف قطر دے 2 ݙینھ دے سرکاری دورے تے دوحہ پڄ ڳئن

اسلام آباد۔23اگست (اے پی پی):وزیرِ اعظم شہباز شریف منڳل کوں قطر دے 2 ݙینھ دے سرکاری دورہ تے دوحہ پڄ ڳئن ،قطر دے وزیر ٹرانسپورٹ جاسم سیف السلیطی دوحہ دے ہوائی اݙے تے وزیراعظم دا استقبال کیتا۔ وزیراعظم آفس دے میڈیاونگ توں جاری بیان موجب وزیرِ اعظم امیرِ قطرشیخ تمیم بن حمد آل ثانی دی دعوت تے قطر دا دورہ کریندے پئن ۔ وزیرِ اعظم دا دورہءِ قطر، پاکستان قطر ݙو پاسے دے تعلقات، تجارت، سرمایہ کاری اتے علاقائی امن کیتے ݙوہیں ملکاں دے تعاون دے ودھارے کیتے ٻہوں اہمیت رکھیندے۔ وزارتِ عظمی سنبھالݨ توں بعد وزیرِ اعظم دے پہلے دورہ قطر اچ پاکستان اچ زراعت، قابلِ تجدید توانائی،ہوابازی، انفراسٹرکچر، سیاحت، لائف اسٹاک، کھاوݨ پیوݨ دیاں چیزاں دی برآمدی صنعت تے ٻئے شعبیں اچ قطری سرمایہ کاری ودھ ویسی ، دورہ قطر اچ وزیرِ اعظم ، امیرِ قطر اتے قطر دی ٻئی اعلی قیادت نال ملاقاتاں کریسن ۔