قطر نال دوستانہ اتے قریبی روابط کوں سرمایہ کاری اتے تجارت دے شعبیاں اچ تعاون نال اڳو تے ودھیسوں، ملکی معشیت کوں تکڑا کرݨ کیتے حکومت پوھریا کریندی پئی اے، وزیراعظم شہباز شریف دا قطر پاکستان سرمایہ کاری کانفرنس نال خطاب

دوحہ۔23اگست(اے پی پی)وزیر اعظم شہباز شریف آکھیے جو قطر نال دوستانہ اتے قریبی روابط کوں سرمایہ کاری اتے تجارت دے شعبیاں اچ تعاون نال اڳو تے ودھیسوں، ملکی معشیت کوں تکڑا کرݨ کیتے حکومت پوھریا کریندی پئی اے۔ اے ڳالھ انہاں قطر دے دورے ویلھے دوحہ اچ تھیوݨ آلی قطر، پاکستان سرمایہ کاری کانفرنس نال خطاب کریندے آکھی۔ وزیراعظم دا آکھݨ ہا جو پاکستان دی معیشت کوں وݙے چیلنجز ہن، درآمدات برآمدات دا فرق مٹاوݨ، تجارت و سرمایہ کاری ودھاوݨ سودھا قابل تجدید توانائی منصوبیاں تے توجہ ݙیوݨ دی لوڑھ اے۔ وزیراعظم آکھیا جو پاکستان قطر نال اپݨے تکڑے تعلقات کوں ودھ اہمیت ݙیندے، شمسی توانائی، ہوا نال بجلی ٻݨاوݨ، ہوا بازی، جہاز رانی، صنعتی و بنیادی ڈھانچہ دی ترقی اتے مہمان نوازی دے شعباں سودھا بالخصوص قابل تجدید توانائی دے شعبہ اچ ݙوطرفہ اقتصادی و سرمایہ کاری روابط کوں ٻیا تکڑا کرݨ دی لوڑھ اے۔ انہاں شاندار استقبال تے قطری قیادت دا شکریہ ادا کریندے آکھیے جو ݙوہیں ملکاں دے تعقلات ہر لنگھدے ویلھے نال ٻئے گھاٹے تھیندے پئن، قطر افغانستان اتے جگ اچ امن کیتے اہم کردار ادا کیتے، قطرنال آپݨے دوستانہ تعلقات کوں ٻیا تکڑا کریسوں۔ انہاں قطری سرمایہ کاراں کوں پاکستان اچ تجارت اتے سرمایہ کاری دے ودھ مواقع اتے سہولتاں توں فیدہ چاوݨ دی دعوت ݙیندے ہوئیں آکھیے قطر دے سرمایہ کار پاکستان دی آزادانہ اتے سرمایہ کار دوست پالیسیاں توں فیدہ چیندے ہوئے زراعت، لائیو سٹاک، سیاحت اتے ٻئے شعبیاں اچ سرمایہ کاری کرن، علاقائی رابطے اتے باہمی خوشحالی کیتے چین۔ پاکستان اقتصادی راہداری دے مواقع توں فیدہ چاتا ونڄے، ایں سانڳے پاکستان قطر دے سرمایہ کاراں کوں ہر قسم دیاں مراعات تے سوکھ ݙیسی۔ وزیراعظم محمد شہبازشریف آکھیے جو پاکستان قطر نال روایتی تکڑے سیاسی تعلقات کوں جامع اقتصادی شراکت داری اچ وٹاوݨ چاہندے، ݙوہاں ملکاں وچال ہوا بازی، جہاز رانی، صنعتی و بنیادی ڈھانچہ دی ترقی اتے قابل تجدید توانائی دے شعباں اچ ݙوطرفہ اقتصادی و سرمایہ کاری دے روابط ودھاوݨ دی لوڑھ اے۔