پورے ملک اچ مینھ تے سیلاب دیاں تباہ کاریاں اچ 9 سو توں ودھ بندے جاں بحق تھی ڳئن ، سینیٹر شیری رحمان

اسلام آباد۔25اگست (اے پی پی):وفاقی وزیر ماحولیاتی تبدیلی سینیٹر شیری رحمان آکھیے جو پورے لک اچ مینھ تے سیلاب دیاں تباہ کاریاں اچ 9 سو توں ودھ بندے جاں بحق تھئن ، ملک دا کوئی ایجھا حصہ کائنی جیڑھا مینھ تے سیلاب دی زد اچ نہ ہووے، افسوس اے جو ایں صورت حال دے باوجود خیبر پختونخوا تے پنجاب اچ سیلاب زدگان دی مدد دے بجائے عمران خان جلسے کریندے پئن ، انہاں کوں صرف اپݨی سیاست بچاوݨ دی فکر اے۔ ھک بیان اچ وفاقی وزیر آکھیے جو مینھ تے سیلاب توں کے پی اچ 169 اتے پنجاب اچ 164 لوگ جاں بحق تھئن ، عمران خان کے پی اتے پنجاب اچ سیلاب زدگان دی جان و مال بچاوݨ دی بجائے اپݨی سیاست بچاوݨ اچ لڳیے پئن ، کیا عمران خان کوں پورے ملک اچ سیلاب نظر نی آندا پیا ؟ انہاں آکھیے جو ھک پاسے پورا ملک ٻڈدا پئے ، کروڑاں لوک متاثر تھئن ݙوجھے پاسے عمران خان لوکاں کوں آکھدے پئن جو “آخری کال” کیتے تیار رہو، پہلے آکھدے ہن آخری گیند تئیں کھیݙساں ہݨ آکھدے پئن آخری کال ݙیساں ، کیا اے احتجاج تے مظاہریں دا ویلھا اے ؟ شیری رحمان آکھیے جو آپݨی سیاست د فکر کرݨ دی بجائے عمران خان کوں سیلاب زدگان دی فکر کرݨی چاہیدی اے، جلسیں دے بجائے سیلاب زدگان دی مدد کرݨی چاہیدی اے، احتجاج کیتے عوام دا سمندر کڈھݨ دا اعلان کرݨ آلے لکھاں بے گھر سیلاب متاثرین نظر نی آندے پئے ، پورا ملک ٻݙ ونڄے لیکن انہاں کوں صرف آپݨی سیاست بچاوݨی اے۔