اے ݙکھی انسانیت دا ہتھ وٹھݨ دا ویلھا اے ، جݙاں تئیں سیلاب توں متاثرہ چھیکڑی گھر آباد نی تھی ویندا آرام نال نہ ٻہساں، وزیراعظم شہباز شریف

چارسدہ۔29اگست (اے پی پی):وزیراعظم شہباز شریف آکھیے جو اے سیاست دا نی ݙکھی انسانیت دا ہتھ وٹھݨ دا ویلھا اے ، جݙاں تئیں سیلاب توں متاثرہ چھیکڑی گھر آباد نی تھی ویندا آرام نال نہ ٻہساں ، دوست ملکاں تے عالمی ادارے سیلاب متاثرین دی مدد کیتے تعاون کریندے پئن ،مخیر حضرات وی اڳوں آون تے متاثرین دی مدد کرن۔ انہاں اے ڳالھ سنوار کوں سپورٹس کمپلیکس چارسدہ اچ سیلاب متاثرین دے امدادی کیمپ دے دورے دے موقع تے میڈیا نال ڳالھ مہاڑ کریندے ہوئیں آکھی اے ، ایں موقع تے وفاقی وزیر اطلاعات ونشریات مریم اورنگزیب، وزیراعظم دے معاون خصوصی انجینئرامیرمقام ، قومی وطن پارٹی دے سربراہ آفتاب احمد خان شیرپائو،عوامی نیشنل پارٹی دے رہنما ایمل ولی خان، اتحادی جماعتاں دے رہنما اتے ٻئے متعلقہ اداریں دے افسران وی موجود ہن ۔ وزیراعظم کوں سیلاب دی صورتحال اتے امدادی سرگرمیاں بارے بریفنگ ݙتی ڳئی ، وزیراعظم کیمپ دے مختلف حصیں دا دورہ کیتے اتے سیلاب متاثرین توں انہاں دے مسئلے پچھیے ۔ وزیراعظم آکھیے جو نوشہرہ، چارسدہ او ٻئے علاقیں اچ سیلابی پاݨی ٻہوں تباہی مچائی اے، خیبرپختونخوا اچ مینھ تے سیلاب توں 242 لوک جاں بحق اتے سینکڑوں زخمی تھئن، کالام ، دیر،سوات،کوہستان اتے بئے علاقیں اچ وسݨ آلے مینھ توں دریا کنارے عمارتاں تے ہوٹلزدریا اچ وھہہ ڳئن ،کھڑیاں فصلاں کوں ضیان پڄے،لکھاں گھر جزوی یا مکمل طور تے تباہ تھی ڳئن ، سڑکاں تے پل وھہہ ڳئن ۔ وزیراعظم آکھیے جو پچھلے 30سال اچ اتنا مینھ نی وٹھا ، وفاقی اتے صوبائی حکومتاں ، این ڈی ایم اے اتے پی ڈی ایم اے افواج پاکستان نال رل تے امداد تے بحالی دا کم کریندے پئن ، سندھ اچ شکارپور،سکھر،لاڑکانہ، نوڈیرو اتے ٻئے علاقیں اچ ہر پاسے پاݨی ہی پاݨی اے ، بلوچستان اچ نصیرآباد، قلات، قلعہ سیف اللہ، چمن اتے ٻئے علاقیں جݙاں جو جنوبی پنجاب اچ وی سیلاب ٻہوں تباہی پھیری اے ، وفاقی حکومت متاثرین دی وختی مدد کیتے 28 ارب روپے جاری کرݙتن ، بے نظیرانکم سپورٹ پروگرام دے ذریعے 25،25 ہزار روپے ݙتے ویندے پئن ، بلوچستان تے سندھ توں بعد خیبرپختونخوا اچ وی ایندا آغاز کرݙتا ڳئے، جاں بحق تھیوݨ آلے لوکاں دے لواحقین کوں 10،10 لکھ روپے دی ادائیگی کیتی ویندی پئی اے ، اڄ وی کجھ خانداناں اچ اے رقم ݙتی ڳئی اے ، انہاں آکھیے نوشہرہ اچ امدادی کیمپ اچ خوراک اتے علاج سودھے ساریاں سہولتاں دا انتظام کیتا ڳئے ، چارسدہ اچ وی دوائیں ، خوراک اتے ٻیاں سہولتاں ݙتیاں ویندیاں پئن ، این ڈی ایم اے، پی ڈی ایم اے ، وفاقی حکومت اتے صوبے رل تے ایں آفت توں پیدا تھیوݨ آلی صورتحال دا مقابلہ کریسن ، سیلاب اتے مینھ پاروں 3کروڑ30 لکھ توں ودھ لوک متاثر تھئن ، افواج پاکستان ݙو لکھ لوکاں کوں ہیلی کاپٹرز اتے کشتیاں دے ذریعے محفوظ جاہ تے پڄائے ، پل تے سڑکاں دی بحالی کیتے وی اقدامات کیتے ویندے پئن ، سیلاب متاثرین دی مدد کیتے بہترین انتظامات تے سارے صوبیں تے گلگت بلتستان دی حکومت کوں خراج تحسین پیش کریندوں ، سیلاب تے مینھ پاروں مجموعی طور تے ھک ہزار توں ودھ لوک جاں بحق تھئن ، ایران، ترکی اتے متحدہ عرب امارات دے صدور نال ڳالھ تھئی اے انہاں سیلاب توں تھیوݨ آلے ضیان تے تعزیت اتے ہمدردی دا اظہار کیتے ، امداد دا اعلان وی کیتے ایں سلسلے اچ امدادی سامان آوݨ شروع تھی ڳئے ، برطانیہ وی سیلاب متاثرین کیتے نقد امداد دا اعلان کیتے جݙاں جو عالمی بینک ، عالمی ادارہ خوراک اتے بئے اداریں دے وی امدا د کیتے پیغامات ملئن ، انہاں آکھیے وختی کوہستان، کالام، سوات اتے دیردا وی دورہ کریساں ، متاثرہ علاقیں کوں آفت زدہ قرار ݙتا ویسی ، سارے اتحادی رل تے متاثرین کوں گھراں اچ آباد کریسن۔