شہباز شریف دا سیلاب اتے مینھ توں متاثرہ ضلع چارسدہ دا دورہ، متاثرہ ہر خاندان کوں 25 ہزار روپے ݙیوݨ دا عمل 3 ستمبر تئیں مکمل کرڳھدا ویسی ، وزیراعظم شہباز شریف

چارسدہ ۔29اگست (اے پی پی):وزیراعظم محمد شہباز شریف آکھیے جو سیلاب اتے مینھ توں متاثرہ ہر خاندان کوں 25 ہزار روپے ݙیوݨ دا عمل 3 ستمبر تئیں مکمل کرڳھدا ویسی ، جاں بحق تھیوݨ آلیں دے لواحقین کوں 10 لکھ روپے ݙتے ویندے پئن، سندھ کیتے 15 ارب روپے جݙاں جو بلوچستان کیتے 10 ارب روپے دی گرانٹ ݙتی اے، خیبرپختونخوا اچ متاثرہ علاقیں دا دورہ مکمل کرݨ توں بعد گرانٹ دا اعلان کریسوں ، سیلاب تے مینھ توں متاثرہ چھیکڑی بندے دی بحالی تئیں آرام نہ نہ ٻہسوں ، سنوار کوں وزیراعظم سیلاب اتے مینھ توں متاثرہ خیبرپختونخوا دے ضلع چارسدہ دا دورہ کیتے جتھاں وزیراعظم متاثرین کیتے قائم امدادی کیمپاں دا دورہ تے متاثرین کیتے کیمپاں اچ سہولتاں دا جائزہ ڳھدے ، ایں موقع تے وزیراعظم کیمپ اچ موجود لوکاں نال ڳالھ مہاڑ کیتی۔ وزیراعظم متاثرین کوں چیک وی ݙتے ۔ وزیراعظم کوں بریفنگ ݙیندے ہوئیں ݙسایا ڳئے جو 16 لکھ دی آبادی اتے ترائے تحصیلاں تے مشتمل چارسدہ توں ترائے دریا لنڳھدن ، اتھاں متاثرین کیتے خیمہ وستیاں بݨائیاں ڳئن ایں ضلع اچ مینھ پاروں پنج اموات جݙاں جو 180 لوک زخمی تھئن، اتھاں ضیان دا سروے جاری اے ، 11 ہزار ایکڑ کپاہ دا رقبہ مینھ پاروں متاثر تھئے۔ ایں موقع تے سابق وفاقی وزیر آفتاب احمد خان شیرپائو، عوامی نیشنل پارٹی دے صوبائی صدر ایمل ولی خان، جمعیت علماء اسلام (ف) دے مرکزی رہنماواں وزیراعظم کوں ݙسایا جو پی ٹی آئی ضمنی انتخابات کیتے جلسے تاں کریندی پئی اے تاں جو کوہستان اچ پتھے پنج لوکاں کوں کڈھݨ کیتے انہاں دا ہیلی کاپٹر نی آیا جݙاں جو ڈی سی اتے اے سی صوبائی حکومت نال ایں حوالے نال رابطہ وی کیتے ، ہݨ صوبائی وزیر اطلاعات بیان ݙتے جو وزیراعلیٰ دا ہیلی کاپٹر ایں کم کیتے کائنی ، انہاں وزیراعظم کوں آکھیے تساں پہلے خادم پنجاب ہاوے ہݨ خادم پاکستان او، اساکوں تساں توں توقعات ہن صوبائی حکومت توں کوئی توقع کائنی ۔ وزیراعظم آکھیے جو مینھ تے سیلاب توں متاثرہ خاندان اچ 25 ہزار روپے دی نقد رقم دی ونڈ 3 ستمبر تئیں مکمل کرڳھدی ویسی ایں کیتے 28 ارب روپے رکھیے ڳئن ، بے نظیر انکم سپورٹ پروگرام دے اعداد و شمار دے تحت اتھاں پیسے ݙتے ویندے پئن۔ انہاں آکھیے نوشہرہ اچ وی نقد رقم دی ونڈ دا عمل شروع تھی چکیے ، وزیراعظم آکھیے سندھ تے بلوچستان اچ ٻہوں تباہی تھئی اے ۔ کالام، کوہستان سودھے بئے متاثرہ علاقیں دا دورہ کرݨ دے بعد خیبرپختونخوا اچ تھیوݨ آلے ضیان دا تخمینہ لاوݨ توں بعد گرانٹ دا اعلان کیتا ویسی وزیراعظم ایں موقع تے سیلاب اچ جاں بحق تھیوݨ آلیں دے لواحقین نال اظہار تعزیت اتے مرحومین کیتے فاتحہ خوانی وی کیتی۔