موسمیاتی تبدیلی پاروں پاکستان کوں ودھ مینھ تے سیلاب دا سامݨا اے ، پاکستان گلوبل وارمنگ توں براہ راست متاثر تھیندا پئے ، وزیر خارجہ بلاول بھٹو زرداری اتے ٻئیں دا پاکستان تے اقوام متحدہ دے مشترکہ پاکستان فلڈ ریسپانس پلان 2022 دے آغاز تے منعقدہ تقریب توں خطاب

اسلام آباد۔30اگست (اے پی پی):وزیر خارجہ بلاول بھٹو زرداری آکھیے جو موسمیاتی تبدیلی پاروں پاکستان کوں ودھ مینھ تے سیلاب دا سامݨا اے ، پاکستان گلوبل وارمنگ توں براہ راست متاثر تھیندا پئے ، ملک دے ٻہوں علاقیں اچ ݙراکلے سیلاب توں وݙے پیمانے تے قیمتی انسانی جاناں دا ضیان تھئے جݙاں جو لائیو سٹاک اتے فصلاں کوں وی ضیان پڄے ، اے ڳالھ انہاں دفتر خارجہ اچ حکومت پاکستان اتے اقوام متحدہ دے مشترکہ پاکستان فلڈ ریسپانس پلان 2022 دے آغاز دے موقع تے منعقدہ تقریب توں خطاب کریندے ہوئیں آکھی اے ۔پاکستان دی امداد دے سلسلے اچ اقوام متحدہ دے سیکرٹری جنرل انتونیو گوتریس دا خصوصی ویڈیو پیغام نشر کیتا ڳئے ۔ وفاقی وزیر منصوبہ بندی اتے ترقی چیئرمین ریلیف کوآرڈینیشن کمیٹی احسن اقبال، وفاقی وزیر موسمیاتی تبدیلی شیری رحمان ، اقوام متحدہ دے ریزیڈنٹ کوآرڈینیٹر، چیئرمین این ڈی ایم اے لیفٹیننٹ جنرل اختر نواز اتے ٻئی اہم شخصیات وی تقریب اچ شرکت کیتی۔ وزیر خارجہ آکھیے جو اڄوکے سال غیر معمولی ساوݨ دا مینھ وسیے، موسمیاتی تبدیلی پاروں اڄوکے سال پاکستان اچ وی ہیٹ ویو سارے ریکارڈ بھن ݙتن انہاں آکھیے مینھ پاروں ملک دے 72 ضلعیں اچ 3 کروڑ لوکاں کوں سیلاب دی صورتحال دا سامݨا اے، سیلاب متاثرین کوں صاف پاݨی اتے روٹی ٹکر دیاں چیزاں تئیں رسائی اوکھی تھی ڳئی اے ۔ وزیر خارجہ بلاول بھٹو زرداری آکھیے جو مینھ تے سیلاب توں معیشت کوں وݙا ضیان پڄے ، بے نظیر انکم سپورٹ پروگرام دے ذریعے متاثرین کوں امداد ݙتی ویندی پئی اے ، پاکستان کوں خیمے تے مچھر داݨیاں دی جلدی لوڑھ اے ،وزیر خارجہ آکھیے جو پاکستان گلوبل وارمنگ توں براہ راست متاثر تھیندا پئے، پاکستان کوں عالمی برادری دی مدد لوڑھ اے ، سیلاب آلے علاقیں اچ بحالی تے نویں سروں تعمیر دی لوڑھ اے ، سیلاب متاثرین دی امداد تے دوست ملکاں تے عالمی برادری دے مشکور ہیسے، پاکستان دی حکومت اتے عوام سیلاب متاثرین دے رلے کھڑن۔ انہاں آکھیے جو اساکوں عالمی برادری دی طرفوں وختی مدد دی لوڑھ اے ، امداد اتے تعاون تے سارے عالمی اداریں اتے دوست ملکاں دے شکر گزار ہیسے۔ وفاقی وزیر منصوبہ بندی و ترقی احسن اقبال تقریب توں خطاب کریندھ ہوئیں آکھیے جو سیلاب زدگان دی بحالی کیتے ݙاہ ارب ڈالر توں ودھ درکار ہوسن ،ودھ سارے مینھ تے تباہ کن سیلاب توں کپاہ دی 50 فیصد فصل متاثر تھئی اے ۔ انہاں آکھیے جو ملک اچ ساوݨ دے شروع توں گھن تے ہݨ تئیں 1100 توں ودھ اموات تھی چکئن ، سیلاب توں پاکستان کوں فوڈ سکیورٹی دے سنگین چیلنجز دا سامݨا اے۔ انہاں آکھیے جو اقوام متحدہ دے ہیومینیٹیرین کوآرڈینیٹر دی پاکستان کیتے امداد دیاں کوششاں قابل تعریف ہن، امید اے عالمی برادری پاکستان دی مدد کیتے اڳوں آسی ۔ اقوام متحدہ دے سیکرٹری جنرل ویڈیو پیغام اچ آپݨی ڳالھ کریندے ہوئیں آکھیے جو پاکستان کوں سیلاب متاثرین کیتے امداد دی لوڑھ اے ۔ انہاں آکھیے جو اقوام متحدہ پاکستان کیتے 160 ملین ڈالر امداد دی اپیل کیتی اے ۔ انہاں آکھیے جو گرین ہائوس گیس عالمی حدت دا باعث بݨدی پئی اے ، پاکستان اچ سیلاب دی صورتحال دا ذکر کریندے ہوئیں انہاں آکھیے جو مہاجرین دی میزبانی کرݨ آلے ملک کوں پیش آندی مشکلات تے دل ٻہوں ݙکھی اے ۔ تقریب توں خطاب کریندے ہوئیں پاکستان اچ اقوام متحدہ دے ریزیڈنٹ کوآرڈینیٹر جولیان ہارنیس آکھیے جو میں سیلاب توں متاثر علاقیں دا دورہ کیتے ، پاکستان اچ سیلاب لکھاں لوکاں کوں متاثر کیتے ۔ انہاں آکھیے جو پاکستان اچ سیلاب توں تباہی تصورتوں کتھائیں ودھ اے ، عالمی برادری موسمیاتی تبدیلی اتے سیلاب توں متاثر پاکستان دے نال یکجہتی دا اظہار کرے۔ نیشنل ڈیزاسٹر مینجمنٹ اتھارٹی (این ڈی ایم اے) دے چیئرمین لیفٹیننٹ جنرل اختر نواز شرکاءکوں ݙسائے جو پاکستان اچ اجوکے سال ساوݨ دا مینھ ویلھے توں پہلے شروع تھیا ، ملک کوں اڄوکے سال چار ہیٹ ویوز دا سامݨا رہیا، ملک دے کئی علاقیں اچ مینھ وسݨ دا 30 سال دا ریکارڈ ترٹ ڳئے ، سیلاب پاروں قومی سطح تے ایمرجنسی دا اعلان کیتا ڳئے ۔ چیئرمین این ڈی ایم اے آکھیے جو ملک دے 72 ضلعیں کوں سیلابی صورتحال دا سامݨا اے، سیلاب توں ݙاہ لکھ توں ودھ گھر متاثر تھئن جݙاں جو 20 لکھ ایکڑ زمین تے 3 کروڑ توں ودھ لوک متاثر تھئن۔