متحدہ عرب امارات دے سفیر دا پاکستان اچ سیلابی صورتحال تے افسوس دا اظہار، امدادی سرگرمیاں جاری رکھݨ دے عزم دا اعادہ

اسلام آباد۔31اگست (اے پی پی):پاکستان اچ متحدہ عرب امارات دے سفیر حمد عبید الزعابی پاکستان دی حکومت اتے برادر عوام نال پورے ملک اچ آوݨ آلے اڄوکے تباہ کن سیلاب دے متاثرین نال تعزیت دا اظہار کیتے ۔ متحدہ عرب امارات دے سفارتخانے ٻدھ کوں جاری بیان موجب سفیر متاثرین دے خانداناں نال آپݨی ہمدردی دا اظہار کریندے ہوئیں زخمیاں دی وختی صحت یابی دی دعا کیتی۔ سفیر آکھیے جو متحدہ عرب امارات دے صدر شیخ محمد بن زید آل نہیان دی ہدایات تے عمل درآمد کریندے ہوئیں پاکستان کیتے انسانی امداد دا ھک فضائی پل قائم کیتا ڳئے جیڑھا جو پاکستان اچ طوفانی مینھ تے سیلاب توں متاثرہ لوکاں کیتے امدادی سامان، پناہ گاہواں دا سامان اتے انسانی ضرورتاں دی ترسیل کریسی ، ایں امداد اچ خوراک، دوائیں خیمے تے ݙوجھا ضروری سامان شامل اے جیں دا مقصد متاثرہ آبادی دی تکلیف کوں گھٹ کرݨ تے انہاں دی مدد کرݨا اے ، بیان موجب پہلا اماراتی امدادی طیارہ اتوار کوں اسلام آباد پڄا جیں اچ خوراک دوائیں تے پناہ گاہواں کیتے خیمے اتے مختلف امدادی سامان ہئی، ایں توں بعد ٻہوں سارے ٻئے امدادی طیارے پاکستان اچ اڄوکے سیلاب اتے طوفانی مینھ دے نتیجے اچ تھیوݨ آلے ضیان کوں گھٹ کرݨ کیتے مدد کریسن ۔ بیان موجب اے امدادی پروگرام ݙوہیں بھرا ملکاں وچال گھاٹے تعلقات تے مضبوطی دی عکاسی کریندے تے اے جو متحدہ عرب امارات گزریل ݙھاکیں دے دوران ٻہوں سارے انسانی بحراناں اچ خاص طور تے قدرتی آفات اچ پاکستان اتے پاکستانی عوام دی مدد کیتی اے ۔