اسلام آباد۔9ستمبر (اے پی پی):اقوام متحدہ دے سیکرٹری جنرل انتونیو گوتیرس آکھیے جو عالمی برادری کوں سیلاب متاثرین دی مدد کیتے پاکستان نال بھر پور تعاون کرݨاچاہیدے۔ او جمعہ کوں نیشنل فلڈرسپانس کوآرڈینیشن سنٹر دے دورہ دے موقع تے اظہار خیال کریندے پئے ہن ۔ ایں موقع تے وزیراعظم محمد شہباز شریف، وفاقی وزیر منصوبہ بندی و ترقی احسن اقبال ، وفاقی وزیر خزانہ مفتاح اسماعیل تے ٻئے موجود ہن ۔ سیکرٹری جنرل آکھیے جو پاکستان انہاں ملکاں اچ شامل اے جنہاں کوں ماحولیاتی تبدیلیاں دا سامݨا اے۔ اڄوکے سیلاب تے قدرتی آفت دے بعداین ایف آرسی سی ، حکومتی اداریں تے این جی اوز بھرپوراندازاچ متاثرین دی مدد کیتے کم کیتے ، انہاں آکھیے ایں اوکھی صورت حال اچ بین الاقوامی برادری کوں پاکستان نال تعاون کرݨا چاہیدے تے سیلاب متاثرین کیتے آپݨا کردار ادا کرݨا چاہیدے ، انہاں آکھیے جو پاکستان نال میݙا گھاٹا رشتہ اے، اے میݙے دل دے نیڑے اے۔ پاکستان افغان پناہ گزیناں دی میزبانی کیتی اے ۔ دہشت گردی پاروں پاکستان کوں وݙے ضیان دا سامݨا کرݨا پئے تے ایندے عوام ٻہوں اوکھ جھلی اے ۔ انہاں آکھیے جو او بین الاقوامی برادری کوں اوکھی صورت حال اچ پاکستان دی مدد کیتے متحرک کریسن ۔وزیراعظم شہبازشریف ، سیکرٹری جنرل کوں ݙسایا جو اڄوکے سیلاب توں بعد وفاقی تے صوبائی حکومتاں بشمول پاکستان دی مسلح افواج متاثرین کوں ہر ممکن مدد ݙتی ، انہاں کوں محفوظ جاہ تے منتقل کیتا تے خوراک اتے پناہ ݙتی ۔ سیلاب توں پاکستان اچ وݙے پیمانے تے تباہی تھئی اے۔ ساݙے سامݨے ٻہوں وݙا چیلنج اے۔ایں اوکھی صورت حال اچ مدد کرݨ آلے مختلف ملکاں تے اداریں دا شکریہ ادا کریندوں ، انہاں اقوام متحدہ دے سیکرٹری جنرل دے دورہ پاکستان تےشکریہ اداکیتا۔ سیکرٹری جنرل کوں ایں موقع تے پاکستان اچ سیلاب تھیوݨ آلیاں تباہ کاریاں تے حکومت دی طرفوں متاثرین دی مدد کیتے اقدامات تے بریفنگ ݙتی ڳئی ۔
