افغانستان اچ 3 ہسپتالاں کیتے پاکستان ھک ارب روپے دی امداد ݙیندا پئے ،وزیرصحت عبدالقادرپٹیل

اسلام آباد۔2دسمبر(اے پی پی):وفاقی وزیر صحت عبدالقادر پٹیل آکھیے جو افغانستان اچ 2.3 ارب روپے دی لاگت نال بݨائے ڳئے 3 ہسپتالاں کیتے پاکستان 1 ارب روپے دی امداد ݙیندا پئے جیں اچوں 50کروڑ روپے دی رقم دوائیں کیتے رکھی ڳئی اے ۔ جمعہ کوں افغانستان دے وزیر صحت کوں دوائیں ݙیوݨ دی تقریب توں خطاب کریندے ہوئیں وفاقی وزیر آکھیے جو افغانستان اچ بݨائے ڳئے ترائے ہسپتالاں جنہاں اچ 200 بستریں تے مشتمل جناح ہسپتال کابل،60 بستریں تے مشتمل نشترہسپتال جلال آباد اتے 160 بستریں تے مشتمل لغاری ہسپتال لوگر شامل ہن ، کیتے پاکستان ھک ارب روپے دی امداد ݙیندا پئے ۔ انہاں آکھیے ایم آر آئی، ایکسرے اتے ڈائیلاسز دے آلات وی ݙتے ڳن جݙاں جو افغانستان دے24 ڈاکٹراں ،24 نرساں اتے 21 ٹیکنیشنز کوں پمز ہسپتال اسلام آباد اچ تربیت ݙتی ڳئی اے تے 15 ڈاکٹراں کوں پشاور دے ہسپتال اچ تربیت ݙتی ڳئی اے ، امدادی رقم اچ 50کروڑ روپے دوائیں مل گھنݨ کیتے رکھئے ڳئن جنہاں اچوں 19 کروڑ روپے دیاں دوائیں گھن ڳھدیاں ڳئن ۔