پورے ملک اچ ھکے ݙینھ انتخابات تھیوݨے چاہیدن ، ویلھے توں پہلے الیکشن کراوݨ دا مقصد نواز شریف کوں الیکشن توں ٻاہر رکھݨا اے ،وفاقی وزیر میاں جاوید لطیف

اسلام آباد۔17اپریل(اے پی پی) وفاقی وزیر میاں جاوید لطیف آکھیے قومی تے صوبائی اسمبلیاں دے الیکشن ھکے ݙینھ تھیوݨے چاہیدن ،ویلھے توں پہلے الیکشن کراوݨ دا مقصد نواز شریف کوں الیکشن توں ٻاہر رکھݨا اے ۔ پریس کانفرنس توں خطاب کریندے ہوئیں انہاں آکھیے موجودہ حالات توں لڳدا پئے جو ھک بندے دی ضد تے الیکشن کراوݨ دی خواہش پوری کیتی ویندی پئی اے حالانکہ قومی تےصوبائی اسمبلیاں دے الیکشن ھکے ݙینھ تھیوݨے چاہیدن ،انہاں آکھیے 2002،2008 اتے2018 اچ نواز شریف کوں الیکشن توں ٻاہر رکھیا ڳیا، ہݨ 2023 اچ وی انہاں دی ایہا خواہش اے۔ انہاں آکھیے اعلیٰ عدلیہ کوں پھلدے پھولدے پاکستان کوں ٻوڑݨ آلیں دے خلاف وی ازخود نوٹس گھنݨا چاہیدا ہئی ، اساں اے الزام کݙاہیں وی نی گھنݨ چاہندے جو مسلم لیگ (ن) الیکشن نی کراوݨ چاہندی ۔ ماضی اچ جیڑھی جیڑھی شخصیات اپݨے اپݨے اداریں کوں ایں سلسلے اچ استعمال کریندے رہیے انہاں دے ادارے ہی انہاں دے خلاف انہاں دا احتساب کرسڳدن جے ایویں تھی ونڄے تاں ملک اچ 80فیصد سکون آویسی ۔