وزیراعظم  شہباز شریف راولپنڈی انسٹی ٹیوٹ آف یورالوجی اینڈ ٹرانسپلانٹیشن اچ علاج دی سہولتاں دے باقاعدہ آغاز دا افتتاح کرݙتا

اسلام آباد۔18اپریل(اے پی پی) وزیراعظم محمد شہباز شریف راولپنڈی انسٹی ٹیوٹ آف یورالوجی اینڈ ٹرانسپلانٹیشن اچ علاج دیاں سہولتاں دے باقاعدہ آغاز دا افتتاح کرݙتا۔ منڳل کوں وزیراعظم انسٹی ٹیوٹ دے مختلف شعبیں دا معائنہ کیتا تے علاج معالجہ دی سہولتاں دا جائزہ ڳھدا ۔ وزیراعظم مریضاں نال وی ملاقات کیتی تے انہاں توں خیریت پچھی تے علاج دیاں سہولتاں بارے پچھیا ۔ ڈاکٹرز نال وزیراعظم ہسپتال اچ مختلف امراض دے علاج  بارے معلومات ڳھدیاں ۔ایں موقع تے وزیراعظم کوں صوبائی سیکرٹری صحت ڈاکٹر احمد جاوید قاضی تفصیلی بریفنگ ݙتی۔ وزیراعظم کوں ݙسایا ڳیا جو شمالی پنجاب اچ علاج دے ایں نویں مرکزدا قیام خوش آئند اے، 2009ء اچ ایں ہسپتال دی منظوری ݙتی ڳئی ہئی اتے اے 255 بستریں تے مشتمل اے، اتھاں راولپنڈی ، شمالی پنجاب اتے ٻئے علاقے دے لوکاں کوں علاج دی بہترین سہولتاں یقینی بݨائیاں ویسن ، پہلے مرحلے اچ ہسپتال اچ ایمرجنسی سروسز دا آغاز تھیندا پئے تے اتھاں ریڈیو تھراپی، یورالوجی ، بلڈ بینک،ڈائیلاسز، پتھالوجی، ایمرجنسی ، ٹرانسپلانٹیشن، نفرالوجی اتے اوپی ڈی سودھے مختلف سہولتاں ݙتیاں ویسن ۔وزیراعظم صوبائی سیکرٹری صحت احمد جاوید قاضی کوں انہاں دی شاندار خدمات تے داد ݙتی تے آکھیے انہاں میݙے رلے 15 ،20 سال کم کیتے ، اے انتہائی قابل اتے ایماندار افسر ہن، نیب اتے نیازی گٹھ جوڑ قابل افسران کوں جیلاں اچ پاتی رکھیا ۔