ایوان میں تے بھرپوراعتماد دا اظہار کرݙتا،  گھر بھجواوݨ چاہندو تاں ہزار واری ونڄݨ کوں تیار ہاں لیکن ایں ایوان دا ماݨ نہ بھنیساں ،پارلیمان دی عزت، توقیر، احترام اتے آئینی اختیار دنیا دی کوئی طاقت نی کھس سڳدی ، وزیراعظم شہباز شریف

اسلام آباد۔27اپریل  (اے پی پی):وزیراعظم محمد شہباز شریف آکھیے ایوان میں تے بھرپوراعتماد دا اظہار کرݙتا،  گھر بھجواوݨ چاہندو تاں ہزار واری ونڄݨ کوں تیار ہاں لیکن ایں ایوان دا ماݨ نہ بھنیساں ،پارلیمان دی عزت، توقیر، احترام اتے آئینی اختیار دنیا دی کوئی طاقت نی کھس سڳدی ، قانون سازی پارلیمان دا اختیار اے اتے عوام دے منتخب ایوان کنے اے اختیار ہمیشہ رہسی ، پارلیمان دے ایں اختیار کوں چیلنج کرݨ سینہ زوری اے، سیاسی ڳالھ مہاڑ تے مذاکرات دا ایجنڈا پورے پاکستان اچ ھکے ݙینھ صاف و شفاف الیکشن دا انعقاد ہوسی ، اساکوں ایں ملک دی تعمیر دی جیڑھی ذمہ واری ملی اے او پوری کرݨ ݙتی ونڄے ۔ قومی اسمبلی توں اعتماد دا ووٹ گھنݨ توں بعد وزیراعظم اپݨے خطاب اچ آکھیے اﷲ تعالیٰ دا لکھ لکھ شکر ادا کرینداں جو ایں معزز ایوان وزیر خارجہ بلاول بھٹو زرداری دی قرارداد تے میکوں ھک واری ول عزت بخشی اے اتے 180 ارکان میں تے اعتماد دا اظہار کیتے۔ وزیراعظم آکھیے او سپیکر قومی اسمبلی، پاکستان پیپلز پارٹی دے شریک چیئرمین آصف علی زرداری، وزیر خارجہ بلاول بھٹو زرداری، جے یو آئی (ف) دے امیر مولانا فضل الرحمن، مولانا اسعد محمود، ڈاکٹر خالد مقبول صدیقی، سردار اختر مینگل، خالد مگسی، چوہدری شجاعت حسین، چوہدری سالک حسین، ایمل ولی خان، امیر حیدر خان ہوتی، نوابزادہ شاہ زین بگٹی، محسن داوڑ، اسلم بھوتانی، پروفیسر ساجد میر، ڈاکٹر عبدالمالک، آفتاب شیرپائو، محمود اچکزئی، علی نواز شاہ اتے شاہ اویس نورانی سودھے سارے ارکان دا دلوں شکریہ ادا کریندن تے یقین ݙویندن جو ایوان میں تے جیڑھے اعتماد دا اظہار کیتے تساڈا ماݨ رکھیساں تے اینکوں کݙاہیں نقصان نہ پڄیساں ۔ وزیراعظم آکھیے 2018ء اچ ملک دی معیشت تکھے ترقی کریندی پئی ہئی اوں توں بعد ھک جھرلو اتے فراڈ الیکشن تھیا، سازش کیویں کیتی ڳئی ، ہݨ سارا کجھ سامݨے آندا پئے ، خواجہ طارق رحیم اتے ثاقب نثار دی  مبینہ آڈیو دے ذریعے سازش کھل تے سامݨے آ ڳئی اے، 2018ء اچ پی ٹی آئی کوں الیکشن جتواوݨ کیتے بدترین دھاندلی کیتی ڳئی ،ازخود نوٹسز دے ذریعے ملک دا حلیہ وڳاڑ ݙتا ، ہزاراں مریض جنہاں دے گردے دی پیوند کاری تھی سڳدی ہئی او موت دے منہ اچ چلے ڳن۔ وزیراعظم آکھیے اوں ویلھے وزیراعظم وعدہ کیتا ہئی جو 2018ء اچ انتخابات دی دھاندلی دے الزامات دی تحقیقات کرائی ونڄن لیکن اڄ تئیں تحقیقات نی کرائیاں ڳیاں ، سپیکر قومی اسمبلی توں مطالبہ کرینداں جو ایں دھاندلی دی تحقیقات کراون تاں جو قوم کوں پتہ چل سڳے جو کیویں عوام دا مینڈیٹ چوری کیتا ڳئے۔ وزیراعظم آکھیے جݙاں آئی ایم ایف نال ساݙی ڳالھ مہاڑ اڳوں ودھدی پئی ہئی تاں اوں ویلھے وی عمران نیازی دے اشارے تے ݙو صوبائی وزراء 22 کروڑ عوام اتے ملک کیتے مشکلات پیدا کرݨ سانڳے تحریر کرݙتا اساں شرط نی منیندے ، سائفر بارے وی سارے ڄاݨدن ، امریکہ کوں نشانہ بݨایا ڳئے تے اوں سازش نال حکومت تبدیل کرائی اے، چین اتے روس دے حوالے نال وی مگرمچھ دے ہنجوں وہائے ڳئے، اﷲ تعالیٰ دے فضل و کرم نال وزیر خارجہ بلاول بھٹو زرداری، وزیر مملکت پٹرولیم اتے باقی وزارتاں دی محنت نال روس توں سستے تیل دا جہاز وختی پاکستان پڄ ویسی ، جے ملک اچ امپورٹڈ حکومت ہوندی تاں کیا روس اساکوں سستا تیل ݙیندا ۔وزیراعظم آکھیے اڄ پارلیمان دے فیصلیں کوں چیلنج کیتا ویندا پئے ، میکوں ایں ایوان منتخب کیتے، اڄ پارلیمان اتھاں فیصلہ کریندی اے تے کابینہ کوں پابند کریندی اے تاں میݙا فرض اے جو ایں پارلیمان دے فیصلیں دا احترام کراں۔ وزیراعظم اعلان کیتے او ہر صورت پارلیمان دے فیصلیں دے نال کھڑن ، اے نی تھی سڳدا جو پارلیمان کوئی قانون بݨاوے تے عدلیہ ایں قانون دی کوئی حتمی شکل اختیار کرݨ توں پہلے ہی حکم امتناعی جاری کرݙیوے۔ وزیراعظم آکھیے آئین بݨاوݨ تے ایندے اچ ترمیم کرݨ پارلیمان دا اختیار اے، عدلیہ کوں آئین ری رائٹ کرݨ دا کوئی اختیار کائنی، توہین عدالت دا وار کرݨ دی تڑی ݙتی ڳئی تے آکھیا ڳئے جو وزیراعظم ایوان دی اکثریت دا اعتماد ونڄا ٻیٹھے تاں اڄ ایوان اپݨا فیصلہ ݙے ݙتے۔ وزیراعظم آکھیے اساں ترائے رکنی بنچ دا فیصلہ نی منیندے ، اساں چار ترائے دا فیصلہ منیندوں ، ذوالفقار علی بھٹو کوں ھک ظلم تے زیادتی دی بناء تے شہید کیتا ڳئے ، نواز شریف کوں نااہل کیتا ڳئے ، یوسف رضا گیلانی کوں نااہل کیتا ڳئے تاں ہݨ جے میکوں گھر بھجویندن تاں ہزار واری ونڄݨ کوں تیار ہاں لیکن  میں ایں ایوان دا ماݨ نہ بھنیساں ۔ وزیراعظم آکھیے اساکوں ڳالھ مہاڑ کیتے آکھیا ڳئے ، اساں سیاستدان ہیسے، ساݙے ہتھ اچ بندوق یا توپ تاݨں درکنار چھڑی تئیں کائنی ، 12 اکتوبر تے اوں توں پہلے تاں چھڑی گھمیندے ہوئیں آ ویندے ہن تاں معاملہ ختم تھی ویندا ہئی اساں آپݨی اتحادی جماعتاں کوں قائل کیتا جو ڳالھ مہاڑ اچ کوئی حرج کائنی ایں سانڳے اساں ڳالھ مہاڑ کریسوں تے امید اے اج توں شروع تھی ویسی لیکن اصل سوال اے ہے جو ڳالھ مہاڑ دا ایجنڈا کیا ہوسی ؟ وزیراعظم واضح کیتے جو مذاکرات دا ایجنڈا پورے پاکستان اچ ھکے ݙینھ صاف شفاف الیکشن دا انعقاد ہوسی ۔ انہاں آکھیے عدالت ہر واری ھک صوبے، پنجاب اچ الیکشن دی ڳالھ کریندی اے ، خیبرپختونخوا انہاں کوں یاد کائنی ، اتھاں الیکشن توں انہاں کوں کوئی سروکار کائنی جݙاں جو  پاکستان چار اکائیاں نال مل تے بݨدے ۔ وزیراعظم آکھیے ھک پارٹی دا مذموم ارادہ اے ہے جو جمہوریت دی آڑ اچ فاش ازم اتے ڈکٹیٹرشپ نافذ کیتی ونڄے اساں انہاں دا دور بھوڳ ڳحدا تے جرأت نال مقابلہ اتے سامݨا کیتے تے ھک ݙینھ وی جیل ونڄ تے نی رنے ، ایوان اچ ایجھے لوک ٻیٹھن جنہاں کئی کئی سال جیلاں کٹئن ۔وزیراعظم اعلان کیتے جو پارلیمان دی عزت، توقیر، احترام اتے آئینی اختیار کوں دنیا دی کوئی طاقت نی کھس سڳدی ، عوام دے منتخب ایں ایوان کنے اے اختیار ہمیشہ رہسی تے میں ایں پارلیمان دے نال کھڑاں تے کھڑا رہساں ۔