وفاقی وزیر اطلاعات مریم اورنگزیب نال قائم مقام برطانوی ہائی کمشنر اینڈریو ڈیگلیش دی ملاقات، پاکستان تے برطانیہ دا سوشل اتے آن لائن میڈیا تے نفرت انگیزی تے دہشت گردی دے رویں متعلق مواد مکاوݨ کیتے رل تے کم کرݨ تے اتفاق

اسلام آباد۔17مئی(اے پی پی) وفاقی وزیر اطلاعات و نشریات مریم اورنگزیب نال برطانیہ دے قائم مقام ہائی کمشنر اینڈریو ڈیگلیش ملاقات کیتی، ݙوہیں ملکاں وچال سوشل اتے آن لائن میڈیا تے نفرت انگیزی اتے دہشت گردی دے رویں متعلق مواد مکاوݨ کیتے رل تے کم کرݨ تے اتفاق تھئے۔ ملاقات اچ میڈیا دے مختلف شعبیں، ڈیجیٹل میڈیا، میڈیا ٹریننگ اتے فلم سازی اچ تعاون سودھے ݙو پاسے سفارتی تعلقات دے ودھارے تے وی ڳالھ مہاڑ تھئی ۔ وفاقی وزیر اطلاعات شاہ چارلس سوئم دی تاجپوشی تے قائم مقام ہائی کمشنر اتے   برطانیہ دے عوام کوں مبارخ ݙتی۔ ایں موقع تے ڳالھ مہاڑ کریندے ہوئیں انہاں آکھیے وزیراعظم شہباز شریف دا اڄوکا دورہ برطانیہ اتے کنگ چارلس سوئم دی تاج پوشی اچ شرکت ݙوہیں ملکاں وچال احترام تے سانجھے اعتماد تے مبنی دوستی دا مظہر اے۔ انہاں آکھیے پاکستان برطانیہ نال ݙو پاسے تعلقات کوں خصوصی اہمیت ݙیندے ۔ وفاقی وزیر اطلاعات ݙوہیں ملکاں وچال تعلقات مزید مضبوط بݨاوݨ دے عزم دا اظہار کیتے ۔ ملاقات اچ فلم پالیسی اتے میڈیا ٹریننگ اچ تعاون تے وی ڳالھ مہاڑ تھئی ۔ وفاقی وزیر اطلاعات آکھیے فلم اتے ڈرامہ کہیں وی ملک دی ثقافت تے مثبت تشخص کوں اجاگر کرݨ اچ اہم کردار ادا کریندن ، انہاں آکھیے جو پاکستان اچ صحت، تعلیم، گورننس اتے انسانی وسائل دی ترقی اچ برطانوی حکومت دا کردار لائق تحسین اے۔ انہاں آکھیے صحافیاں کوں تربیت ݙیوݨ کیتے برطانیہ دے جدید میڈیا نصاب توں مدد ڳھدی ویسی ۔ ایں موقع تے قائم مقام برطانوی ہائی کمشنر پاکستان دی موجودہ حکومت دی معاشی پالیسیاں سودھے اطلاعات دے شعبہ اچ تھیوݨ آلے ترقی دی تعریف کیتی ۔ انہاں میڈیا فریڈم انڈیکس اچ پاکستان دے 7 درجے بہتر تھیوݨ کوں ٻہوں چنڳاں قرار ݙتا تے وزیر اطلاعات کوں مبارخ ݙتی ۔ قائم مقام برطانوی ہائی کمشنر پاکستان دے اقتصادی بحران کوں گھٹ کرݨ کیتے ہر ممکن تعاون دا یقین ݙیوائے تے ݙوپاسے تعلقات ودھاوݨ کیتے نیک خواہشات تے گھاٹی دلچسپی دا اظہار کیتے۔