پاک ایران آزادانہ تجارت دے معاہدے کوں وختی حتمی شکل ݙیسن ، بارڈر مارکیٹ دے قیام اتے نویں ٹرانسمیشن لائن توں سانجھی یاری تکڑی تھیسی ، وزیراعظم محمد شہبازشریف

ردیگ۔18مئی(اے پی پی) وزیراعظم محمد شہبازشریف آکھیے پاکستان اتے ایران دے درمیان آزادانہ تجارت دے معاہدے کوں وختی حتمی شکل ݙتی ویسی ، ایران دے صدر نال تجارت ، سرمایہ کاری، انفارمیشن ٹیکنالوجی، زراعت، شمسی توانائی اتے معیشت دے ٻئے شعبیں اچ تعاون ودھاوݨ تے تفصیلی ڳالھ مہاڑ تھئی اے ، بارڈر مارکیٹ دے قیام اتے نویں ٹرانسمیشن لائن توں پاک ایران یاری تکڑی تھیسی ، سانجھی تجارت اچ ودھارا تھیسی تے اے منصوبے ݙوہیں ملکاں دے عوام دی ترقی تے خوشحالی کیتے سنگ میل ثابت تھیسن ۔انہاں اے ڳالھ پاک ایران سرحد تےعمائدین نال ڳالھ مہاڑ کریندے ہوئیں آکھی اے ۔ وزیراعظم آکھیے ایران دے صدر ابراہیم رئیسی نال سانجھی دلچسپی دے سارے امور تے مفیداتے تفصیلی ڳالھ مہاڑ تھئی اے ۔ ݙوہیں پاسوں سنجیدگی تے خلوص دے نال ایں امر دابرملا اظہار کیتا ڳئے جو ݙوہیں بھرا ملک تے اسلامک ملکاں تجارت ، سرمایہ کاری ، انفارمیشن ٹیکنالوجی، زراعت اتے معیشت دی ݙوجھے شعبے اچ ھک ݙوجھے نال تعاون کریسن ۔ آزادانہ تجارت کوں وختی حتمی شکل ݙتی ویسی۔ اے طے پاتے جو ایران توں بجلی دی ترسیل اچ وݙی گنجائش اے ایندے وچ سانجھے تعاون کوں ودھارا ݙتا ویسی ۔ وزیراعظم آکھیے انہاں دی تجویزتے ایرانی صدر یقین ݙیوائے جو شمسی توانائی دے شعبے اچ ݙوہیں ملکاں وچال تعاون کوں تکھے ودھارا ݙتا ویسی کیوں جو ایندے وچ وݙی گنجائش اے ۔وزیراعظم آکھیے انہاں ملاقات اچ سی پیک تے مثبت تجاویز پیش کیتن ۔ ساݙے درمیان مفید اتے مثبت ڳالھ مہاڑ تھئی اے تے ایں عمل درآمد کیتے تکھے اقدامات کیتے ویسن۔ وزیراعظم آکھیے اڄ مند۔پشین ۔ بارڈر مارکیٹ دا افتتاح کیتا ڳئے ۔ ایں منصوبے توں ݙوہیں ملکاں اچ تجارت ودھسی ۔ ملحقہ علاقیں اچ ترقی اتے خوشحالی آسی ۔اتھاں تجارتی مراکز بݨسن ۔ جنہاں دے ذریعے تجارت تھیسی ۔ اے او اہداف ہن جنہاں کیتے ایران تے پاکستان رل تے آپݨے عوام دی ترقی اتے خوشحالی دا پیغام گھن آسڳدن ۔ وزیراعظم آکھیے شمسی توانائی دے شعبے اچ تعاون کیتے ھک ݙوجھے دے ملکاں دا دورہ کریسوں ۔ اڄ پاکستان تے ایران کیتے وݙا ݙینھ اے ۔ گوادر کیتے 100 میگاواٹ بجلی دی ترسیل سانڳے ٹرانسمیشن لائن دا منصوبہ تاخیر دا شکار تھیا۔ موجودہ حکومت ایں تے تکھے کم مکمل کیتا تے ایران دے صدر ایندے وچ ذاتی دلچسپی ڳھدی اے ۔بجلی دے ٹیرف کوں وی سانجھی رضامندی نال طے کرڳھدا ڳئے ۔ پاک ایران دوستی دے حوالے نال اے منصوبے ٻہوں اہمیت رکھیندن ۔ ایندے نال ݙوہیں ملکاں دی یاری تکڑی تھیسی تے تے عوام دی ترقی اتے خوشحالی کیتے سنگ میل ثابت تھیسی ۔