چین، سعودی عرب، ترکیہ، مصر اتے اومان سری نگر اچ جی۔20 اجلاس اچ شرکت نہ کرتے  بین الاقوامی قانون اتے اقوام متحدہ دے چارٹر دی بالادستی کیتے کھڑے تھئن ، ترجمان دفتر خارجہ

اسلام آباد۔25مئی(اے پی پی) پاکستان سری نگر اچ جی20 اجلاس اچ شرکت نہ کرݨ تے چین، سعودی عرب، ترکیہ، مصر اتے اومان دی شاندار الفاظ اچ تعریف کریندے ہوئیں آکھیے اے ملک بین الاقوامی قانون اتے اقوام متحدہ دے چارٹر دی بالادستی کیتے کھڑے تھئن، پاکستان اقوام متحدہ دی سلامتی کونسل دی متعلقہ قرارداداں دے مطابق کشمیری عوام دی انہاں دی ناقابل تنسیخ حق خودارادیت گھنݨ دی منصفانہ جدوجہد دی اخلاقی، سفارتی اتے سیاسی حمایت جاری رکھیسی ۔ دفتر خارجہ دی ترجمان ممتاز زہرا بلوچ پریس بریفنگ اچ جی۔20 ٹورازم ورکنگ گروپ دے اجلاس دی میزبانی کرݨ دے بھارتی اقدام کوں یکسر مسترد کریندے ہوئیں آکھیے جموں و کشمیر بین الاقوامی طور تے منیا ڳیا متنازعہ علاقہ اے، اے جھیڑا ست ݙھاکیں توں ودھ عرصے توں اقوام متحدہ دی سلامتی کونسل دے ایجنڈے تے موجود اے ایں پس منظر اچ بھارت اقوام متحدہ دی سلامتی کونسل دی متعلقہ قرارداداں، اقوام متحدہ دے چارٹر دے اصولاں اتے بین الاقوامی قانون کوں مکمل طور تے نظر انداز کریندے ہوئیں آپݨے غیر قانونی طور تے زیر تسلط جموں و کشمیر اچ ایں اجلاس دی میزبانی کیتی۔ ترجمان آکھیے جی20 اجلاس دا متنازع علاقے اچ انعقاد بھارت دے غیر قانونی طور تے زیر تسلط جموں و کشمیر دے لوکاں نال غداری اے، عالمی برادری انہاں دی حالت زار تے توجہ ݙیوے تے قبضے اتے انسانی حقوق دی خلاف ورزیاں دا خاتمہ کرے۔ انہاں آکھیے مقامی آبادی کوں یرغمال بݨا تے اتے انہاں  کوں انہاں دے حقوق اتے آزادی توں محروم کر تے سیاحت تے ترقی کوں فروغ نی ݙتا ونڄ سڳدا ۔ ترجمان دفتر خارجہ آکھیے سری نگر اچ جی۔20 اجلاس دے انعقاد نال بھارت مقبوضہ کشمیر تے اپݨے غیر قانونی قبضے اتے کشمیری عوام تے ظلم و ستم دی حقیقت کوں لکا نی سڳدا ۔انہاں آکھیے 22  مئی کوں وزیر خارجہ بلاول بھٹو زرداری آزاد جموں و کشمیر دی قانون ساز اسمبلی توں خطاب کیتا  او آزاد جموں و کشمیر دی قانون ساز اسمبلی توں خطاب کرݨ آلے پاکستان دے پہلے وزیر خارجہ ہن۔ ترجمان آکھیے وزیر خارجہ اپݨے خطاب اچ کشمیری عوام دی ہمت کوں سلام پیش کیتے تے شہدا کوں زبردست خراج عقیدت پیش کیتے۔ انہاں لائن آف کنٹرول دے نیڑے رہݨ آلی آبادی نال مخلصانہ ہمدردی دا اظہار اتے کشمیری عوام نال پاکستان دی پراݨی وابستگی اتے یکجہتی دا اعادہ کیتے۔