نومئی دے شرپسنداں کوں قانون تے انصاف مطابق سزا ضرور ملسی ، وزیر اعظم شہباز شریف  دی ریڈیو پاکستان پشاور دا دورہ کرݨ تے ڳالھ مہاڑ، عمارت دی مرمت دا کم وختی شروع کرݨ دی ہدایت

پشاور۔25مئی(اے پی پی) وزیراعظم محمد شہبازشریف آکھیے 9 اتے 10 مئی دے  دلخراش واقعات پاکستانی عوام کوں ݙکھی کیتے ، 9 مئی دے شرپسنداں  تے دہشت گرداں و وطن دشمناں اچ کوئی فرق کائنی ، انہاں شرپسنداں کوں قانون اتے انصاف  مطابق سزا ضرور ملسی تاں جو کوئی ول ایجھی جسارت نہ کرسڳے، تاریخی اتے قومی ورثے کوں ساڑ ݙیوݨ حب الوطنی کائنی ، ریڈیو پاکستان دے ملازمین دے حوصلے دی داد ݙینداں، وزیراطلاعات ریڈیو پاکستان دی متاثرہ عمارت کوں وختی بحالی کیتے اقدامات چاون ۔او ریڈیو پاکستان پشاور دے دورے دے موقع تے ڳالھ مہاڑ کریندے پئے ہن ۔ ایں موقع تے وزیراطلاعات ونشریات مریم اورنگزیب ، ڈی جی ریڈیو پاکستان  طاہر حسن وی خطاب کیتا تے ریڈیو پاکستان کوں 9 اتے 10 مئی کوں بلوائیاں دے ہتھوں تھیوݨ آلے ضیان تے بحالی دے کماں تے بریفنگ ݙتی۔ایں موقع تے گورنر خیبرپختونخوا حاجی غلام علی، نگران وزیراعلیٰ اعظم خان، وفاقی وزرا رانا ثنا اللہ، اسحاق ڈار، احسن اقبال ، مشیر امیر مقام  تے ٻئے وی موجود ہن ۔وزیراعظم آکھیے اڄ اساں سارے ریڈیو پاکستان دی تاریخی عمارت کوں ݙیکھ تے ݙکھی ہن ، ایں عمارت اچ پاکستان بݨݨ توں پہلے ریڈیو دا سیٹ اپ موجود ہئی تے اتھوں لاہور وانڳوں 13 اتے 14 اگست 1947 دی درمیانی شب آزادی دیاں صداواں بلند تھیاں تے پوری دنیا کوں ایں تاریخی مرکز توں قائد اعظم دی عظیم جدوجہد اتے لکھاں مسلماناں دی قربانیاں دے نتیجے اچ پاکستان دے معرض وجود اچ آوݨ دی نوید سݨائی ڳئی۔ 9 اتے 10 مئی دے دوران جیڑھے دلخراش واقعات تھئن اوں پاکستان اچ وسݨ آلے 23 کروڑ عوام  کوں ٻہوں ݙکھ ݙتے تے کاوڑ دی ھک لہر پورے پاکستان اچ آئی ۔ انہاں آکھیے جیں سنٹر توں پاکستان بݨݨ دی نوید سݨائی ڳئی اوں کوں راکھ داڈھیر بݨا ݙیوں ،ایں توں ودھ تے ملک دشمنی  نی تھی سڳدی ۔ ایندے نال  چاغی دی یادگار کوں تباہ کر ݙتا ڳئے ، اے یادگار پاکستان  دی دفاعی طاقت دا شاہکار ہئی جیں دا آغاز ذوالفقار علی بھٹو کیتا تے ایندی انتہا 28 مئی 1998  کوں تھئی ۔ ایں دوران ساریاں حکومتاں ایں عظیم دفاعی پروگرام کیتے آپݨا حصہ پاتا ۔ وسائل تے توانائیاں ݙتیاں۔ ایں شرپسندی اچ ملوث عناصر کوں قانون دے مطابق ضرور سزا ملسی ۔ وزیراعظم  وزیراطلاعات کوں آکھیے او ریڈیو دی عمارت دی مرمت دا کم وختی شروع کراون تاں جو اے ادارہ ول پاکستان اتے پوری دنیا اچ ساݙے عزم تے ولولے دا ذکر کر سڳےجو مشکلات دے باوجود اساں قائد اعظم دے پاکستان دا خواب ضرور شرمندہ تعبیر کریسوں۔