سول تے دفاعی تنصیبات کوں نشانہ بݨاوݨ آلے ملک دشمناں کوں کیفرکردار تئیں نہ پڄایا تاں قوم اساکوں معاف نہ کریسی ، کہیں بے گناہ دے نال زیادتی نہ تھیسی ، وزیراعظم  شہبازشریف

پشاور۔25مئی(اے پی پی) وزیراعظم محمد شہبازشریف آکھیے 9 اتے 10 مئی کوں سول اتے دفاعی تنصیبات کوں نشانہ بݨاوݨ آلے ملک دشمناں کوں کیفرکردار تئیں نہ پڄایا تاں قوم اساکوں معاف نہ کریسی ، کہیں بے گناہ دے نال زیادتی نہ تھیسی ، سول عمارتاں تے حملیں دے مجرماں دے خلاف انسداد دہشت گردی ایکٹ جݙاں جو دفاعی تنصیبات تے حملہ آوراں اتے منصوبہ سازاں دے خلاف دفاعی اداریں کوں حاصل آئینی اختیار دے تحت  کارروائی تھیسی۔ گورنر ہائوس اچ امن  و امان متعلق اجلاس اچ ڳالھ مہاڑ کریندے ہوئیں وزیراعظم آکھیے اے اجلاس کجھ ݙینھ پہلے سݙݨ دا فیصلہ کیتا ہئی ۔ مصروفیات دی وجہ توں اے اجلاس نہ تھی سڳیا ۔9 اتے 10 مئی  کوں جیڑھے دلخراش واقعات تھئن ایں حوالے نال زوم تے اجلاس منعقد کیتے ۔ایں ݙینھ پاکستان دے دوست نما دشمناں دہشت گردی کیتی تے پاکستان دی دفاعی تنصیبات تے حملہ کرتے او کم کیتا جیڑھا دشمن 75 سال اچ نی کرسڳیا ۔ وفاقی حکومت نے صوبائی حکومتاں  اتے اداریں نال رل تے اے فیصلہ کیتے جو سول تنصیبات تے حملے تے بھن تروڑ کرݨ آلیں تے منصوبہ سازاں دے خلاف انسداد دہشت گردی ایکٹ  دے قانون دے مطابق کارروائی تھیسی جݙاں جو دفاعی تنصیبات  تے حملیں دے خلاف قانون جیڑھا اختیار دفاعی اداریں کوں ݙتے ایندے تحت  قانونی کارروائی تھیسی۔ وزیراعظم آکھیے اے ہدایت کیتی اے جو ایں عمل اچ کہیں بے گناہ کوں نقصان نہ پڄے تے کہیں نال زیادتی وی نہ تھیوے تاں جو لوک  بالواسطہ یا بلاواسطہ ملک دشمنی اچ ملوث پاتے ڳئے یا منصوبہ بندی کیتی ، او سارے ایں جرم اچ شامل ہن تے انہاں کوں قانون دے مطابق سزا ملݨی چاہیدی اے ، نتاں قوم اساکوں معاف نہ کریسی جے اساں اپݨے قومی فرض کوں امانت جاݨ تے ادا نہ کیتا تاں ایں توں پاکستان کوں ناقابل تلافی نقصان پڄسی۔