یوم تکبیر تے قوم کوں مبارخ ،خطے اچ طاقت دے توازن کوں برقرار رکھݨ کیتے جوہری دھماکے ناگزیر ہن، صدرمملکت دا یوم تکبیردے موقع تے پیغام

اسلام آباد۔28مئی  (اے پی پی):صدرمملکت ڈاکٹرعارف علوی یوم تکبیردے موقع تے قوم کوں مبارخ ݙیندے ہوئیں آکھیے اساکوں آپݨی سیاسی تے عسکری قیادت دے کم کوں چنڳاں آکھݨا چاہیدے جنہاں ملک دے دفاع کوں ناقابل تسخیر بݨیندے ہوئیں ایٹمی صلاحیت دے حصول کیتے ایں ویلھے ھک دانشمندانہ فیصلہ کیتا، خطے اچ طاقت دے توازن کوں برقرار رکھݨ کیتے جوہری دھماکے ناگزیر ہن۔  ایوان صدرپریس ونگ توں جاری بیان موجب صدرمملکت آکھیے او یوم تکبیر دے موقع تے پاکستانی قوم کوں مبارخ ݙیندن ، اڄ دے ݙینھ 25 سال پہلے بھارت دے ایٹمی دھماکیں دے جواب اچ پاکستان ایٹمی تجربات کیتے جیڑھے جو خطے اچ طاقت دے توازن کوں برقرار رکھݨ کیتے ناگزیر ہن ۔صدرمملکت آکھیے جوہری صلاحیت دا حصول واقعی ھک قابل ذکر کارنامہ ہئی اتے ایں کیتے ساݙے سائنسدان، انجینئرز، ایں ویلھے دی سیاسی اتے عسکری قیادت قابل تحسین اے۔ ایں ݙینھ پوری قوم آپݨے نامور انجینئرز اتے سائنسداناں دی خدمات کوں خراج تحسین پیش کریندی اے جنہاں تھوڑے عرصے اچ پاکستان کوں ایٹمی قوت بݨا ݙتا۔ صدرآکھیے اساکوں آپݨی سیاسی اتے عسکری قیادت دی تعریف کرݨی چاہیدی اے جیں ملک دے دفاع کوں ناقابل تسخیر بݨیندے ہوئیں ایٹمی صلاحیت دے حصول کیتے ایں ویلھے ھک دانشمندانہ فیصلہ کیتے، ایں کیتے ساݙی پوری قوم انہاں سارے لوکاں دی ممنون اے جنہاں پاکستان کوں پہلی اسلامی ایٹمی طاقت بݨاوݨ اچ اپݨا کردار ادا کیتے۔صدرآکھیے اڄ دے ݙینھ ، آؤ اساں آپݨے لوکاں دی فکری ترقی اچ سرمایہ کاری کرݨ تے اپݨے دفاع کوں یقینی بݨاوݨ کیتے سائبر سکیورٹی کوں مضبوط بݨا تے پاکستان کوں ھک محفوظ ملک بݨاوݨ دا عہد کرن۔  میکوں امید اے جو اساں آپݨی اجتماعی کوششاں توں پاکستان دے دفاع کوں ناقابل تسخیر بݨاوݨ اچ کامیاب تھی ویسن ۔  اللہ ساݙا حامی و ناصر ہووے۔