عمران خان آئین، قانون، صداقت اتے امانت دی ہر لکیر پارکیتی،سانحہ 9 مئی دا ملبہ اپݨے کارکناں اتے پارٹی رہنماواں تے پاتے کوڑ مریندے پئن جو او ایندے ذمے وار کائنی ، مریم اورنگزیب

اسلام آباد۔1جون(اے پی پی):وفاقی وزیر اطلاعات ونشریات مریم اورنگزیب آکھیے عمران خان  اپݨے کارکناں اتے پارٹی رہنماواں دے دل اتے ذہن  نفرت دے زہر توں بھر تے سانحہ 9 مئی کرایا، ہݨ کوڑ مریندے پن جو ایندے او ذمے وار کائنی ، اے او بندہ اے جیں آئین، قانون، صداقت اتے امانت دی ہر لکیر پارکیتی۔ خمیس کوں عمران خان دے انٹرویو تے رد عمل ݙیندے ہوئیں آپݨے ٹویٹ اچ وفاقی وزیراطلاعات عمران خان دے انٹرویو دے جملے ” میکوں جیل اچ سٹیسن تاں ردعمل تاں ہووݨا ہئی ” ، ݙوجھے جملے  “اے سارے ورکراں اتے پارٹی رہنماواں کیتے”  دا حوالہ ݙیندے ہوئیں آکھیے اے  انٹرویو کائنی ، دوغلے اتے کوڑے کردار دی شخصیت دا آئینہ اتے اصل چہرہ اے، اے انہاں ساریں کیتے سبق اے جیڑھے گمراہ دی گمراہی اتے فریب دا شکار تھئے ، ہر غلط کم خود کیتے، ہر واری وٹھیے ونڄݨ تے الزام ݙوجھیں کوں ݙتا وفاقی وزیر  آکھیے “ون پیج” توں “میں تاں بے اختیار ہم “،”امریکا  میݙی حکومت ڈھائی ” توں “محسن نقوی میݙی حکومت ڈھائی ” تئیں دے کوڑ گھڑݨ آلے بندے ہݨ 9 مئی دا ملبہ وی آخر کار اپݨےکارکناں اتے پارٹی رہنماواں تے سٹ ݙتے، انہاں آکھیے جنہاں فسادی دے بھڑکاوݨ تے پاکستان کوں ساڑیا، قومی وقار اتے شہدا دی بے حرمتی کیتی، ایہو کم اوں فارن فنڈنگ دا ملبہ پارٹی رہنماواں تے سٹ ݙتا ۔ عمران خان ھک کروڑ نوکریاں، پنجاہ لکھ گھر، سائفر، تاریخی کرپشن دا ملبہ ݙوجھیں تے پاتا ،  ا او بندہ اے جیں آئین، قانون، صداقت اتے امانت دی ہر لکیر پارکیتی۔ وفاقی وزیر آکھیے عمران خان ھک سال توں آپݨے کارکناں اتے پارٹی رہنماواں دے دل تے ذہن نفرت دے زہر نال بھریے تے سانحہ 9 مئی کرایا، ہݨ کوڑ مریندا پئے جو میں ذمے وار کائنی ۔ امید اے جو عشق عمرانی اچ سڑݨ آلے پروانیں تے دیوانیں دی ہݨ تسلی تھی ڳئی ہوسی ۔ اے او  محسن کشی اے جیں تے سارے لوک چھوڑ چھوڑ تے ویندے پئن ۔