اراکین پارلیمنٹ و صوبائی اسمبلی دے اثاثیاں، واجبات دے گوشوارے ݙیوݨ دی حتمی تاریخ 31 دسمبر مقرر، الیکشن کمیشن

اسلام آباد۔12ستمبر(اے پی پی):الیکشن کمیشن آف پاکستان آکھیے جو اراکین پارلیمنٹ و صوبائی اسمبلی دے اثاثیاں اتے واجبات دے گوشوارے مالی سال 23۔2022 دے جمع کراوݨ دی چھیکڑی تاریخ 31 دسمبر 2023 رکھی ڳئی اے۔ الیکشن ایکٹ 2017 دی دفعہ 137 دے تحت سارے اراکین پارلیمنٹ و صوبائی اسمبلی اپݨے، ذال ٻالاں دے ترکے دی تفصیلات مجوزہ فارم۔بی دی شکل اچ 31دسمبر 2023 تئیں الیکشن کمیشن کوں جمع کرا ݙیون، سیکشن137 دی ذیلی شق(1) دے تحت کمیشن ہک پریس ریلیز اچ ہر سال یکم جنوری کوں مقررہ تاریخ تئیں مطلوبہ گوشوارے جمع نہ کراوݨ آلیاں دے ناں چھپیسی، 15 جنوری تئیں گوشوارے نا ݙیوݨ آلیاں دی اسمبلی رکنیت معطل کرݙتی ویسی اتے گوشوارے جمع کراوݨ تئیں او پارلیمنٹ و اسمبلی دی کہیں وی کاروائی اچ نا ونڄ سڳسن۔ غلط معلومات ݙیوݨ تے الیکشن کمیشن 4 مہینے دے اندرو این بدعنوانی تے کارروائی کریسی۔ ایں معاملے تے ہدایات/ رہنمائی نال مقررہ فارم۔بی الیکشن کمیشن سیکرٹریٹ اسلام آباد، متعلقہ صوبائی الیکشن کمشنر دے دفاتر، سینٹ سیکرٹریٹ، قومی و صوبائی اسمبلیاں دے سیکرٹریٹ توں مفت ملسی اتے الیکشن کمیشن آف پاکستان دی ویب سائٹ تے وی موجود ہوسی۔