نگراں وزیراعظم انوار الحق کاکڑ دی اڳواݨی اچ گلگت بلتستان دے ترقیاتی منصوبیاں اتے امن و امان بارے جائزہ اجلاس

گلگت۔12ستمبر(اے پی پی):نگراں وزیراعظم انوارالحق کاکڑ گلگت اچ مذہب دے ناں تے فساد کھنݙاوݨ آلے عناصر دی ویلھے تے نشاندہی اتے انہاں دے خلاف سخت اقدامات دی ہدایت کریندے آکھیے جو پاکستان دے سارے شہریاں دی حفاظت ریاست دی ذمہ داری اے۔ اے ڳاکھ انہاں گلگت بلتستان اچ ترقیاتی منصوبیاں تے اڳونہی اتے امن و امان دی صورتحال بارے اجلاس اچ بریفنگ ویلھے آکھی۔ اجلاس اچ وزیراعظم کوں آئی ٹی، صحت، تعلیم اتے ٻئے شعبیاں اچ اقدامات جیویں گلگت بلتستان دے اضلاع بالخصوص دیامر و استور اچ تعلیمی مسائل دے حل، طلباء کوں چنڳی غذا دے پروگرام، تعلیمی عمارتاں دی نویں سروں تعمیر و بحالی، اساتذہ دی پیشہ وارانہ تربیت، جدید ٹیکنالوجی آلے سمارٹ سکولاں دی تعمیر بارے ݙسایا ڳیا۔ اجلاس اچ گلگت بلتستان اچ صحت دے شعبے اچ سہولتاں دا وی جائزہ ڳھدا ڳیا۔ اجلاس اچ ماحولیاتی و سیاحتی شعبے کیتے اقدامات، زراعت دی ترقی، فصلاں کیتے سبسڈی پروگرام، پن بجلی دی پیداوار دی حقیقی استعداد اتے بجٹ دی صورت حال تے وی غور کیتا ڳیا۔ اجلاس اچ نگران وزیر داخلہ سرفراز بگٹی، نگران وزیر اطلاعات و نشریات مرتضیٰ سولنگی، گورنر گلگت بلتستان سید مہدی شاہ، وزیر اعلیٰ گلگت بلتستان گلبر خان، چیف سیکرٹری گلگت بلتستان، آئی جی گلگت بلتستان اتے متعلقہ اعلیٰ افسران شامل ہن۔