اسلام آباد۔18ستمبر(اے پی پی) وزارت مذہبی اموردے انتظام نال 48ویں 2 ݙینھ وار بین الاقوامی سیرت النبی ﷺ کانفرنس 11 اتے12 ربیع الاول(28اتے 29ستمبر) کوں اسلام آباد اچ تھیسی ،اے کانفرنس تقسیم انعامات مقابلہ مقالات و کتب سیرت ونعت اتے سیرت النبیﷺ کانفرنس ݙو اہم حصیں تے محیط ہوسی ۔اڄوکے سال مقابلہ مقالات و کتب سیرت ونعت دا اعلان فروری اچ کیتا ڳیا ہئی جیں دا عنوان ’’ملکی معاشی استحکام کیتے حکمت عملی، سیرت النبیﷺ دی روشنی اچ ‘‘ہئی ۔واضح رہے جو مقابلہ مقالات و کتب وسیرت کیتے وزارت کوں ملݨ آلے سارے مقالات و کتب کوں ابتدائی طور تے وزارت دی سطح تے ھک سکروٹنی کمیٹی شرطاں تے ضوابط دے مطابق پرکھدی اے ، ایں مرحلے اچ منتخب تھیوݨ آلی ہر کتاب تے ہرمقالے کوں گھٹ توں گھٹ 3ماہرین تے مشتمل ججز دی کمیٹی کوں تفصیلی جانچ پڑتال سانگے بھیجا ڳئے ، اے جج اتے ماہرین یونیورسٹیاں دے پی ایچ ڈی دی سطح دے پروفیسرز ہوندن ۔ بعد اچ انہاں ماہرین دی رپورٹاں کوں ھک اعلیٰ سطحی ایپکس کمیٹی دے حوالے کیتا ویندے، اے کمیٹی ہر کتاب و مقالہ کوں مذکورہ رپورٹاں دی روشنی اچ پرکھ تے فیصلہ کریندی اے جو کیڑھی کتاب کیڑھے انعام دی مستحق اے ۔ ایویں انعام یافتہ قرار پاوݨ آلی کتاب یا مقالات سیرت دا تعین ہوندے ۔اڄوکے سال مقابلہ کتب و سیرت و نعت کیتے 137کتاباں موصول تھئن جنہاں اچوں انعام حاصل کرݨ آلے خوش نصیب اراد دی تعداد 31اے جݙاں جو 94مقالات سیرت ملئن تے جنہاں اچ انعام حاصل کرݨ آلے لوکاں دی تعداد 35اے۔ اڄوکے سال کل 66خوش نصیب لوک انعام یافتگان اچ شامل ہوسن ۔انعام حاصل کرݨ آلیں کوں یادگاری شیلڈز، سرٹیفیکیٹس اتے نقد انعامات ݙتے ویسن۔ وزارت مذہبی امور معیاری مقالیں کوں چھپوا تے پورے ملک دی جامعات دی لائبریاں اتے سیرت النبیﷺدے موضوع تے تحقیقی اداریں کوں مفت ݙیسی ۔ سیرت النبیﷺکانفرنس ڈے ݙو سیشن ہوسن ،پہلے سیشن اچ مقالات کتب تے سیرت و نعت دے موضوع تے مقابلیں اچ حصہ گھنݨ آلے اول ، ݙوجھے تے تریجھے آوݨ آلے مصنفین تے شعرا کوں انعام ݙتے ویسن ۔وزارت مذہبی امور دے انتظام نال ہر سال سیرت کانفرنس اچ ملکی اتے غیرملکی معروف مذہبی سکالرز شرکت کریندن جیں دا مقصد علماءکرام دے سانجھے میل جول توں فکری فاصلیں کوں گھٹ کرݨ تے ھک ݙوجھے کوں سمجھݨ دا موقع ملدے ایندے توں مذہبی ہم آہنگی ، رواداری تے وی چنڳے اثرات تھیندن ۔کانفرنس دے افتتاحی سیشن اچ محفل نعت تھیسی جیں اچ ملک دے نامور نعت خواں نبی اکرم ﷺدی مدح سرائی کریسن ۔کانفرنس دے ݙوجھے ݙینھ مرکزی تقریب اچ سیرت النبیﷺ دے مختلف پہلوواں کوں اجاگر کیتا ویسی، موضوع دی مناسبت نال سکالرز تے خطبا مختلف عنوان معیشت دا تصوراتی پہلوسیرت النبیﷺدی روشنی اچ ،فلاحی معیشت دا قیام سیرت النبیﷺدی روشنی اچ ،معیشت اتے معاشرت دے تعلق دا پہلوسیرت النبیﷺدی روشنی اچ ،معیشت اتے اخلاق دے تعلق دا پہلوسیرت النبیﷺدی روشنی اچ ،معاشی استحکام اچ ریاست دا کردارپہلوسیرت النبیﷺدی روشنی اچ ، زکوۃ ، صدقات دا معاشی استحکام اچ کردار دا پہلوسیرت النبیﷺدی روشنی اچ ،اسلام دا مثالی معاشی نظام دا پہلوسیرت النبیﷺدی روشنی اچ ، معاشی استحکام کیتے لوکاں دی تعلیم و تربیت سیرت النبیﷺدی روشنی اچ ، کسب معاش دی فضیلت تے معاشی استحکام کیتے ایندی اہمیت سیرت النبیﷺدی روشنی اچ ،معاشی استحکام کیتے منصوبہ بندی دی اہمیت اتے ضرورت سیرت النبیﷺدی روشنی اچ معاشی استحکا م اچ تریمتاں دا کردارسیرت النبیﷺدی روشنی اچ ‘‘تے ڳالھ مہاڑ کریسن۔
