اقوام متحدہ دے اجلاس اچ شرکت سانڳے نگران وزیر اعظم  دے رلے وزیر خارجہ اتے سیکرٹری خارجہ وفد اچ شامل ہن، ترجمان دفتر خارجہ

اسلام آباد۔20ستمبر(اے پی پی) دفتر خارجہ دی ترجمان ممتاز زہرہ بلوچ آکھیے نگران  وزیر اعظم انوار الحق کاکڑ اقوام متحدہ دی جنرل اسمبلی دے 78ویں اجلاس اچ شرکت کیتے نیویارک اچ ہن ، نگراں وزیر خارجہ جلیل عباس جیلانی اتے سیکرٹری خارجہ محمد سائرس سجاد قاضی انہاں دے رلے وفد اچ شامل ہن۔ ترجمان ٻدھ کوں اتھاں پریس بریفنگ اچ آکھیے جو وزیراعظم گزریل ݙینھ ایران دے صدر سید ابراہیم رئیسی نال ملاقات کیتی تے عالمی ترقی دے اقدام تے پائیدار ترقی دے اہداف بارے سربراہی اجلاس دے لیڈرز ڈائیلاگ تے اعلیٰ سطحی اجلاس اچ شرکت کیتی۔ پائیدار ترقی دے اہداف سمٹ لیڈرز ڈائیلاگ اچ وزیراعظم  خاص طور تے ترقی پذیر ملکاں کیتے پائیدار ترقی دے اہداف دے حصول اچ درپیش چیلنجاں تے روشنی پاتی۔انہاں موسمیاتی انصاف تے زور ݙتے جیں اچ کلائمیٹ فنانس اچ سالانہ 100 ارب ڈالر توں ودھ دے وعدے دی تکمیل، ایندی رقم دا نصف موسمیاتی موافقت کیتے مختص کرݨ تے ”لاس اینڈ ڈمیج“ فنڈ دا وختی آغاز شامل اے۔ ترجمان آکھیے وزیر خارجہ نیویارک اچ کئی کثیر الجہتی پروگرامز اچ شرکت کیتی جیں اچ مشرق وسطیٰ دے امن کیتے وزراء دی سطح دا اجلاس اتے او آئی سی دی چھی رکنی کمیٹی فلسطین دا اجلاس وی شامل اے۔ ایں موقع تے وزیر خارجہ بیلاروس، کیوبا، مالٹا، ناروے، ہالینڈ، سعودی عرب اتے متحدہ عرب امارات دے وزراء خارجہ سودھے آپݨے ٻہوں سارے منصوبیں تے ݙوپاسے ملاقاتاں کیتیاں، انہاں ایشیا سوسائٹی اچ خطاب وی کیتا۔ ترجمان آکھیے او آئی سی کمیٹی دے اجلاس اچ وزیر خارجہ مسئلہ فلسطین کیتے ݙو ریاستی حل دے پاکستان دے اصولی موقف دا اعادہ کیتے۔ ترجمان آکھیے ایشیا سوسائٹی اچ آپݨے خطاب اچ وزیر خارجہ پاکستان دی خارجہ پالیسی دے عزم تے زور ݙتے جیں دیاں پاڑاں سانجھے طور تے فیدہ مند تعاون ، پرامن بقائے ، سانجھے احترام اتے سانجھی اقتصادی ترقی تے قائم ہن۔ انہاں ھک پرامن ہمسائیگی سانگے پاکستان دے وژن دا اشتراک کیتا، جیں اچ دہشت گردی دا مقابلہ کرݨ ، افغانستان اچ امن تے استحکام اتے پاکستان اتے بھارت وچال پراݨے جھیڑے بالخصوص جموں تے کشمیر دے جھیڑے دا حل شامل اے۔